Ishyirahamwe ry’Umukino wa Volleyball mu Rwanda ryatangaje ko kuri uyu wa gatandatu tariki 16 Gicurasi 2026 saa 18:00 harakinwa umukino wa kane w’imikino ya nyuma ya kamarampaka mu kiciro cy’abagabo, Police VC icakirana n’ikipe ya REG VC muri Petit Stade i Remera.
Umukino wa gatatu wabaye ku wa gatandatu w’icyumweru gishize warangiye REG VC itsinze Police VC amaseti 3-1 byatumye mu ruhererekane rw’imikino 5, Police VC ikomeza kuyobora n’intsinzi y’imikino 2-1 mu gihe amakipe aba agomba gutanguranwa gutsinda imikino 3.
Ibi bivuze ko kuri uyu mukino wa kane, Police VC niramuka iwutsinze izahita yegukana igikombe cya shampiyona y’u Rwanda ya volleyball mu bagabo bwa mbere mu mateka yayo.
Mu gihe REG VC ariyo yatsinda uyu mukino wa kane bizatuma amakipe yombi anganya imikino 2-2 hanyuma hiyambazwe umukino wa gatanu ari nawo uzaca impaka.
Umwanya wa gatatu wamaze kwegukanwa n’ikipe ya Kepler VC nyuma yo gutsinda Gisagara VC imikino 3-0 naho mu kiciro cy’abagore byose byamaze gusobanuka aho igikombe cyegukanwe na APR WVC itsinze Kepler WVC imikino 3-1 naho Police WVC yegukanye umwanya wa gatatu nyuma yo gutsinda RRA WVC imikino 3-0.
What do you feel about this post?
Like
Love
Happy
Haha
Sad
