Ghana: Hemejwe umushinga w’itegeko rihana ubutinganyi n’ababushyigikira.

Inteko Ishinga Amategeko ya Ghana yemeje umushinga w’itegeko rishya rigamije gukaza ibihano ku bikorwa by’ubutinganyi no ku bantu babushyigikira, mu cyemezo gikomeje guteza impaka zikomeye haba imbere mu gihugu no ku rwego mpuzamahanga.

Uyu mushinga w’itegeko uteganya ko umuntu uvuga cyangwa utangaza ko ari umutinganyi ashobora guhanishwa igifungo kigera ku myaka itatu. Unashyiraho ingingo isaba abaturage gutanga amakuru kuri polisi igihe bamenye ibikorwa bifitanye isano n’ubutinganyi bibujijwe n’amategeko, ibyo bamwe bise “inshingano yo kumenyesha”.

Abadepite bawemeje bavuga ko ugamije kurengera umuryango nyarwanda wa Ghana, umuco n’indangagaciro gakondo. Reverend John Ntim Fordjour, watanze uyu mushinga, yavuze ko uzafasha gukaza amategeko asanzweho no kurushaho guhangana n’ibikorwa by’abaryamana bahuje ibitsina n’ababashyigikira.

Uyu mushinga kandi uteganya ko umuntu wese ugaragaza ko ashyigikiye ubutinganyi cyangwa yiyita “inshuti” y’abatinganyi ashobora gukurikiranwa n’amategeko.

Icyakora, usonera abanyamwuga bo mu bucamanza, itangazamakuru n’ubuvuzi, igihe bakora inshingano zabo zo gutanga amakuru cyangwa serivisi ku bantu bose batavangura.

Perezida wa Ghana, John Dramani Mahama, ni we ugomba gushyira umukono kuri uwo mushinga kugira ngo ube itegeko.

Perezida Mahama yari yaragaragaje mbere ko ashyigikiye amahame avuga ko hariho ibitsina bibiri gusa, umugabo n’umugore, ndetse ko ishyingiranwa rigomba kuba hagati y’umugabo n’umugore.

Ku rundi ruhande, imiryango mpuzamahanga iharanira uburenganzira bwa muntu yakomeje kwamagana uyu mushinga. Human Rights Watch yavuze ko ushobora gushyira mu kaga ubuzima n’umutekano by’abatinganyi ndetse ugashishikariza abaturage kunekana no kuregana.

Imibonano mpuzabitsina hagati y’abahuje ibitsina isanzwe itemewe muri Ghana hashingiwe ku mategeko yasizwe n’igihe cy’ubukoloni bw’Ubwongereza.

Mu mwaka wa 2024 na bwo Inteko Ishinga Amategeko yari yemeje umushinga usa n’uyu, ariko ntiwahindutse itegeko kubera ibibazo by’amategeko byari byarajyanywe mu nkiko mbere y’uko Perezida w’icyo gihe, Nana Akufo-Addo awushyiraho umukono.

Icyemezo cya Ghana gikomeje kwiyongera ku bindi byafashwe n’ibihugu bimwe byo muri Afurika mu myaka ya vuba. Muri Werurwe 2026, Senegal yemeje itegeko riteganya ibihano bikomeye ku bikorwa by’ubutinganyi no kubwamamaza, mu gihe Uganda yo yashyizeho amategeko ateganya ibihano bikarishye cyane ku byaha bimwe bifitanye isano n’ubutinganyi.

Mu gihe abashyigikiye uyu mushinga bavuga ko urengera umuco n’indangagaciro z’Abanya-Ghana, abanenga bo bavuga ko ushobora guteza ihonyorwa ry’uburenganzira bwa muntu no gukaza ivangura rikorerwa abaryamana bahuje ibitsina. Perezida Mahama ni we utegerejweho ijambo rya nyuma ku hazaza h’iri tegeko.