Polisi ya Uganda yatangaje ko yafashe umugabo witwa Jonathan Ahimbisibwe wo mu gace ka Makindye, akurikiranyweho ibikorwa byo kwiyitirira umwuga w’umuhanga mu by’isanzure (astronaut) kugira ngo ashuke abaturage.
Uyu mugabo ashinjwa kwakira amafaranga y’abantu batandukanye ababwira ko ashobora kubagezaho amabuye akomoka ku kwezi. Polisi ivuga ko ayo masezerano yakoreshwaga nk’amayeri yo kubambura amafaranga.
Bamwe mu baturage bavuga ko bamwizeye kubera uburyo yavugaga ibintu bijyanye n’ubumenyi bw’isanzure n’imishinga yo mu kirere, bigatuma abantu benshi bumva ko ari umuntu wizewe kandi ufite ubumenyi budasanzwe.
Polisi yatangaje ko iperereza rigikomeje kugira ngo hamenyekane umubare nyawo w’ababa barahuye n’iki gikorwa cy’uburiganya.
Muri Kampala, iyi nkuru yakomeje kuvugisha benshi, aho bamwe bagaragaza impungenge z’ukuntu hari abantu bakoresha inzozi n’ubumenyi buke bw’abaturage mu kubashuka no kubungukiraho.
What do you feel about this post?
Like
Love
Happy
Haha
Sad
