Minisitiri w’Intebe w’u Rwanda, Dr Nsengiyumva Justin yakiriye mugenzi we wa Côte d’Ivoire Robert Beugré Mambé bagirana ibiganiro byibanze ku bufatanye mu nzego zitandukanye.
Ni ibiganiro byabaye ku gicamutsi cyo kuri uyu ku wa 15 Gicurasi 2026.
Minisitiri w’Intebe Robert Beugré Mambé ari mu Rwanda aho yitabiriye inama ya 13 ya Africa CEO Forum ihuza abayobozi b’ibigo bitandukanye, abashoramari n’abanyapolitike baturutse muri Afurika no hirya no hino ku Isi, yabereye mu Rwanda kuva 14-15 Gicurasi 2026.
Mu butumwa Ibiro bya Minisitiri w’Intebe byatangaje bubinyujije ku mbuga nkoranyambaga basobanuye ko ibiganiro byabo byibanze ku gushimangira ubufatanye mu nzego z’ingenzi zitandukanye hagati y’u Rwanda na Côte d’Ivoire.
Mu butumwa bagize bati “Minisitiri w’Intebe Nsengiyumva yakiriye mugenzi we, Robert Beugré Mambé, Minisitiri w’Intebe wa Côte d’Ivoire, uri mu Rwanda mu rwego rwo kwitabira Inama ya Africa CEO Forum 2026. Ibiganiro byabo byibanze ku gushimangira ubufatanye mu nzego z’ingenzi zitandukanye hagati y’u Rwanda na Côte d’Ivoire.”
U Rwanda na Côte d’Ivoire ni ibihugu bisanzwe bifitanye imibanire myiza mu nzego zirimo ubucuruzi.
Muri Werurwe 2025, Ambasaderi w’u Rwanda muri Ghana, Rosemary Mbabazi yashyikirije Perezida Ouattara impapuro zo guhagararira u Rwanda muri icyo gihugu.
Icyo gihe kandi banagiranye ibiganiro bigamije kurebera hamwe uburyo impande zombi zarushaho gushyigikira umubano usanzwe hagati yazo, binyuze mu kubyaza umusaruro amasezerano y’isoko rusange rya Afurika, AfCFTA.
Impande zombi zari ziherekejwe mu biganiro byahuje ba Minisitiri bombi.
Ibiganiro byabereye mu Biro bya Minisitiri w’u Rwanda i Kigali.
What do you feel about this post?
Like
Love
Happy
Haha
Sad
