APR FC yanyagiwe na Al Hilal ibitego 4-0

APR FC yatsinzwe n’ikipe ya Al Hilal SC yo muri Sudan ibitego 4-0 ku munsi wa 30 wa Shampiyona y’u Rwanda, BK Pro League bigumisha Rayon Sports mu rugendo rwo gushaka igikombe cya Shampiyona.

Kuri uyu wa kane tariki 7 Gicurasi 2026 ikipe ya APR FC yakiriye ikipe ya Al Hilal kuri Kigali Pele Stadium mu mukino w’umunsi wa 30 wa Shampiyona y’u Rwanda, BK Pro League.

APR FC yagiye gukina uyu mukino isabwa kuwutsinda kuko byari kuyongerera amahirwe yo gutwara igikombe cya Shampiyona y’uyu mwaka dore ko Rayon Sports bahanganye nayo yari yatakaje kuri uyu wa gatatu imbere ya AS Muhanga, Rayon Sports yatsinzwe igitego 1-0.

APR FC itarifite bamwe mu bakinnyi bayo basanzwe babanzamo barimo Ruboneka Jean Bosco, Niyigena Clement na Ssekiganda Ronald kubera ibibazo by’imvune hamwe na William Togui utariwemerewe gukina kubera yujuje amakarita 3 y’umuhondo yatangiye nabi itsindwa igitego ku munota wa 11 w’umukino.

Igitego cya mbere cya Al Hilal cyatsinzwe na Elhadj Kane. Ku munota wa 33, Al Hilal yabonye igitego cya kabiri nyuma y’uko myugariro Ishimwe Abdoul wa APR FC wavuye mu ikipe ya Mukura VS&L yitsinze igitego bituma igice cya mbere kirangira Al Hilal SC iyoboye umukino n’ibitego 2-0.

Ibindi bitego bibiri bya Al Hilal byaje mu gice cya kabiri bitsinzwe na Abdelrazig Taha ku munota wa 67 na Mohamed Yousif ku munota wa 79, umukino muri rusange urangira ari ibitego bine (4) bya Al Hilal ku busa (0) bwa APR FC.

Undi mukino w’umunsi wa 30 wa BK Pro League wabaye kuri uyu wa kane ni umukino wahuje Al Merreikh SC n’ikipe ya Etincelles FC, uyu mukino warangiye Al Merrreikh itsinze ibitego 4-1.

Nyuma y’imikino yo kuri uyu wa kane yanashyize akadomo ku munsi wa 30 wa Shampiyona, Al Hilal iracyayoboye urutonde rwa Shampiyona n’amanota 67, ikurikirwa na Al Merreikh ifite amanota 58 zombi zigifite n’umukino w’ikirarane, APR FC ni iya gatatu n’amanota 56, Rayon Sports ni iya kane n’amanota 48 naho Kiyovu Sports ni iya gatanu n’amanota 47.

Amakipe ari mu rugamba rwo kudasubira mu kiciro cya kabiri ni AS Kigali ya 14 ifite amanota 29, Amagaju FC ya 15 n’amanota 28, Etincelles FC ya 16 n’amanota 27, AS Muhanga ya 17 n’amanota 27 na Rutsiro FC ya nyuma n’amanota 26.