Etincelles iri guhumeka umwuka wa nyuma yongerewe Miliyoni 81 Frw

Ikipe ya Etincelles FC iri guhumeka umwuka wa nyuma irwana no kutisanga mu makipe amanuka mu cyiciro cya kabiri cya Shampiyona y’Umupira w’amaguru mu Rwanda, yongerewe Miliyoni 81 Frw kuzo yari yarahawe zabaye iyanga.

Inama njyanama idasanzwe y’Akarere ka Rubavu yateranye kuri uyu wa gatanu, tariki 16 Gashyantare 2024, mu ngingo yasuzumye harimo iyagarutse ku ngengo y’imari ivuguruye, ari naho batoreye ko ikipe ya Etincelles FC yakongererwa amafaranga yari yarahawe, ngo harebwe nimba yakongera gusasa imigeri muri shampiyona.

Iyi kipe iri muzigisasa imigeri zihagarariye uturere mu ntara y’iburengerazuba, imaze  imikino 5 yikurikiranya idaheruka icyitwa amanota 3, abenshi mubakurikiranira hafi ibya ruhago bakavuga ko ubukene bwanumaga muri iyi kipe, kuko hari ubwo abakinnyi bamaraga kabiri batarakora ku munwa

Kuri uyu wa 17 Gashyantare 2024, iyi kipe yanganyije na Musanze FC igitego 1-1, mu gihe yaherukaga kunganya na Police FC nabwo igitego 1-1. Iyi kipe iheruka amanota atatu kuwa 13 Ukuboza 2023 ubwo yataindaga Gasogi United ibitego 2-1.

Ibi biyishyira ku mwanya wa 14, aho mu mikino 21 imaze gukina ifite amanota 21 n’umwenda w’ibitego 10, ni mu gihe ibanziriza Bugesera FC ya 15, imaze gukina imikino 20 ikaba ifite amanota 20 na Etoille de l’Est ya nyuma n’amanota 13 mu  mikino 20 imaze gukina.

Amafaranga yari yaragenewe iyi kipe mu ngengo y’imari yemejwe n’inama njyanama y’aka karere yeteranye kuwa 30 Kamena 2023, yaru Miliyoni 120 Frw, kuri ubu yahise agera kuri Miliyoni 201 Frw.

Ubwo twifuzaga kumenya impamvu Inama njyanama yafashe umwanzuro wo kongerera Etincelles FC izi Miliyoni 81 Frw, Perezida w’inama njyanama y’akarere ka Rubavu, Dr. Kabano Ignace yatubwiye ko atatuvugisha kuko Umuvugizi w’akarere ari Umuyobozi w’Akarere, nawe wahise atubwira ko azadushakira igihe cyo kutuvugisha.

Amakuru agera kuri Rwandanews24 avuga ko ziriya Miliyoni 120 Frw zahawe iyi kipe ku ikubitiro zabaye iyanga, kuko zarangiranye n’icyociro kibanza cya Shampiyona, imikino yo kwishyura igarangira iyi kipe iri kwicira isazi mu maso.

Hari n’abavuga ko kuva akarere ka kwinjira mu micungire y’amafaranga kagenera iyi kipe, ibibazo ari byose kuko mu buyobozi bw’ikipe batakibona aho bakura amafaranga yo gutegura umukino (Kwishyura ibitemewe) kuko ayo mafaranga atabona uko yitwa mu ibaruramari.

Amafaranga agenerwa iyi kipe ni kimwe mu bibazo by’ingume byagoye Ubuyobozi bw’aka karere kubisobanurira PAC ubwo baheruka kuyitaba, babasobanurira imikoreshereze y’ingengo y’imari.