Abanyamakuru batanu bakorera Al Jazeera, barimo n’umunyamakuru uzwi cyane Anas al-Sharif, bishwe n’igitero cya Israel hafi y’ibitaro bya Al-Shifa mu Mujyi wa Gaza, nk’uko televiziyo Al Jazeera yabitangaje.
Al-Sharif n’undi munyamakuru, Mohammed Qreiqeh, hamwe n’abafotora Ibrahim Zaher, Mohammed Noufal na Moamen Aliwa, bari mu ihema ryagenewe abanyamakuru ku muryango nyamukuru w’ibyo bitaro ubwo baraswaga, nk’uko Al Jazeera ibivuga.
Yagize iti: “Iki gitero cyabaye ku cyumweru, cyari igikorwa cyo kwica cyateguwe, kikaba ari ikindi kimenyetso gikomeye cyerekana ihohoterwa rikomeje gukorerwa itangazamakuru.”
Ingabo za Israel (IDF) zemeje ko zagabye igitero kuri Anas al-Sharif, zivuga ko yari umuyobozi w’agatsiko k’iterabwoba ka Hamas.
Zongeyeho ko yari umwe mu bateguraga ibitero bya roketi bigamije kwica abasivile b’Abanya-Israel n’ingabo za IDF.
Komite irengera abanyamakuru (CPJ) yatangaje ko yababajwe cyane n’icyo gitero kandi ko Israel yananiwe gutanga ibimenyetso byemeza ibyo ishinja al-Sharif.
Jodie Ginsberg, umuyobozi wa CPJ, yabwiye BBC ati: “Ni ibintu bisanzwe bikorwa na Israel si muri iyi ntambara gusa, ahubwo ni ibintu bimaze imyaka myinshi aho umunyamakuru yicwa n’ingabo za Israel hanyuma Israel igatangaza ko yari umuyoboke w’iterabwoba, ariko ntitange ibimenyetso bifatika.
Mohamed Moawad, umuyobozi w’itangazamakuru wa Al Jazeera, we yavuze ko al-Sharif yari umunyamakuru wemerewe gukora, akaba ari ijwi ryonyine ryatumaga isi imenya ibibera muri Gaza.
Mu gihe cy’iyi ntambara, Israel ntiyemeye ko abanyamakuru mpuzamahanga binjira muri Gaza ngo batangaze ibibera yo ku buryo bwisanzuye bityo ibitangazamakuru byinshi bikaba byishingikiriza ku banyamakuru b’imbere mu gace ka Gaza.
Ku wa 10 Kanama 2025, igitero cy’indege cyakozwe n’ingabo za Isiraheli cyahitanye abanyamakuru batanu ba Al Jazeera bari mu ihema ry’abanyamakuru hafi y’ibitaro bya al-Shifa mu mugi wa Gaza.
Muri abo harimo Anas al-Sharif, umunyamakuru w’imyaka 28 wamenyekanye cyane kubera gutara amakuru y’intambara mu majyaruguru ya Gaza, hamwe na Mohammed Qreiqeh, Ibrahim Zaher, Mohammed Noufal, na Moamen Aliwa.
Ingabo za Isiraheli (IDF) zavuze ko zateye icyo gitero zigamije kwica al-Sharif, zimushinja kuba umuyobozi w’itsinda rya Hamas rishinzwe kurasa ibisasu ariko Al Jazeera n’imiryango irengera uburenganzira bw’abanyamakuru nka Komite yo Kurengera Abanyamakuru (CPJ), bahakanye ibyo birego, bavuga ko nta bimenyetso bifatika byatanzwe bigaragaza ko al-Sharif yari umunyamuryango wa Hamas.
Al Jazeera yamaganye icyo gitero igisobanura nk’igikorwa cyabaye kigamije gucecekesha abanyamakuru batanga amakuru ku by’ukuri bibera muri Gaza. Mu itangazo, Al Jazeera yavuze ko al-Sharif yari umwe mu banyamakuru b’intwari ba Gaza, kandi ko kwicwa kwe ari igikorwa cyo kwibasira ubwisanzure bw’itangazamakuru.
Mbere y’uko yicwa, al-Sharif yari yanditse ubutumwa kuri X (Twitter), avuga ko ibitero bya Isiraheli byari byiyongereye cyane mu mugi wa Gaza. Mu butumwa bwe bwa nyuma, yavuze ko yabayeho mu bubabare bwose, ariko ntiyigere areka gutanga amakuru y’ukuri ku byaberaga muri Gaza .
Kuva intambara yatangira muri Ukwakira 2023, abanyamakuru barenga 200 bamaze kwicwa muri Gaza, benshi muri bo bakaba ari Abanyapalestine . Ibi byatumye imiryango mpuzamahanga isaba ko abanyamakuru barindwa, kandi ko habaho iperereza ryigenga ku byaha byibasira abanyamakuru.
What do you feel about this post?
Like
Love
Happy
Haha
Sad
