Bugesera: Hagaragaye abarwayi babiri barwaye ubushita bw’inkende

Ubuyobozi bw’Ibitaro bya Nyamata mu Karere ka Bugesera bwatangaje ko abantu babiri banduye indwara y’ubushita bw’inkende (monkeypox), mu bantu 13 bakekwagaho kwandura iyi ndwara. Abo barwayi bari kwitabwaho muri ibyo bitaro.

Dr. Jean Marie Vianney Sebajuri, Umuyobozi Mukuru w’Ibitaro bya Nyamata, yatangaje ko kuri uyu wa Mbere tariki ya 5 Kanama 2024, abarwayi babiri barimo umwe uri mu Bitaro bya Nyamata ndetse n’undi uri i Ntarama. Yongeyeho ko ibipimo byafashwe ku bantu batanu basuzumwe i Ntarama byagaragaje ko bane bataranduye, uretse umuntu umwe uri gukurikiranwa.

Yakomeje avuga ko hagitegerejwe ibindi bisubizo bizagaragaza niba hari abandi bantu banduye. Ati, “Hari n’ibindi bisubizo umunani tugitegereje ngo tumenye icyo ibipimo byafashwe bigaragaza kandi baracyari mu kato.”

Dr. Sebajuri yavuze ko ibitaro biri gufasha abaturage kubasuzuma ku bigo nderabuzima, kandi ko ikipe y’ibitaro yahuguriwe gukora iyi mirimo ndetse ihabwa ibikoresho byabugenewe byaturutse muri Laboratwari y’Igihugu. Ibipimo bifatwa bikaba bitanga ibisubizo mu minsi itarenze ibiri.

Umuyobozi w’Akarere ka Bugesera, Mutabazi Richard, yasabye abaturage kwirinda iyi ndwara no gufata ingamba zo kutayandura ndetse no kutayikwirakwiza mu bandi. Yagize ati, “Icya mbere iyi ndwara irahari kandi abaturage turabasaba kugira isuku bakirinda kuramukanya no guhoberana. Twifuza ko babimenya kare kugira ngo twirinde ko twarwaza abaturage benshi.”

Ubuyobozi bw’Ibitaro bya Nyamata buvuga ko buri kuvura abarwaye iyi ndwara bukoresheje imiti yabugenewe.