“Miliyari ibihumbi 400 agiye gushyirwa mu gisirikare cya DR Congo harangizwe ikibazo cy’umutekano.” Judith Suminwa

Minisitiri w’intebe wa DR Congo Judith Suminwa yatangaje ko leta izashyira 20% by’ingengo y’imari yayo y’imyaka itanu mu kongerera ingufu igisirikare na polisi kugira ngo bibashe kugarura amahoro cyane cyane mu burasirazuba bw’igihugu.

Mu muhango wo kwemeza guverinoma nshya ya Repubulika ya Demokarasi ya Congo ku wa kabiri, Judith Suminwa yagaragaje gahunda y’imyaka itanu y’iyi leta akuriye.

Mu ijambo ryamaze hafi amasaha abiri, Suminwa yarambuye inkingi esheshatu n’ibikorwa nyamukuru byazo iyi guverinoma ye izibandaho hagati ya 2024 na 2028.

Suminwa usanzwe ari inzobere mu bukungu, yavuze ko inkingi ya mbere ari “uguhanga imirimo no kuzamura ubushobozi bw’ingo bwo guhaha ibizitunga muri ibi bihe by’izamuka ry’ibiciro rikomeye”.

Yavuze ko ibi bigomba kugendana no “gusaranganya ubukungu bw’igihugu mu buryo bukwiye kandi bungana” hamwe n’icyerekezo kigari cya Congo cya 2050 cyo “kurandura ubukene”.

Yagize ati: “Gusa, intambara z’imitwe yitwaje intwaro zihora zigaruka zidindiza iterambere ry’ubukungu, hakiyongeraho ubukene, ubusumbane, n’ingaruka z’ihindagurika ry’ikirere bikomeza gutindahaza abaturage.”

Yongeraho ati: “Nk’uko mubizi igihugu cyacu cyatewe n’abo hanze bituma miliyoni z’abaturage bacu baba mu buhungiro, bugarijwe n’imirire mibi, inzara n’agahinda.”

Yavuze ko leta ye igomba kugira icyo ikora “byihutirwa” mu gufasha abaturage bari mu kaga mu burasirazuba, no “gukora ibishoboka mu guhagarika uko gushotorwa kwo hanze no kugarura amahoro.” Ati: “Ni inshingano zacu nk’igihugu cyigenga kurinda ubusugire bwacyo no kurengera abaturage bacyo mu bufatanye no kwiyemeza.

“Ni yo mpamvu inkingi ya kabiri y’iyi guverinoma igendanye no kurinda ubusugire bw’igihugu no kurinda abaturage n’ibyabo.”

Suminwa yavuze ko iyi nkingi yonyine izatwara miliyari ibihumbi 400 z’amafaranga ya Congo (arenga miliyari 18 USD) yo gushyira muri gahunda zo kongerera ubushobozi igisirikare na polisi mu myaka itanu iri imbere. Ati: “Ayo angana na 20% by’ingengo y’imari y’iyi ‘programme’ [ya leta].”
Suminwa yirinze kuvuga yeruye ko leta ye izongera imbaraga mu mirwano ingabo za leta zirimo kurwana n’inyeshyamba za M23. Gusa ati: “Tugiye gukora ibishoboka byose, tuyobowe na perezida wa Repubulika, mu kugarura amahoro arambye mu burasirazuba bwa Congo, [abahatuye] bambuwe ubu hashize imyaka 30.”

Hashize imyaka ibiri imirwano yubuye hagati ya M23 n’uruhande rwa leta, uyu mutwe umaze kwigarurira ibice binini bya teritwari za Rutshuru na Masisi mu ntara ya Kivu ya Ruguru.

Kinshasa ivuga ko yatewe n’u Rwanda ruciye muri M23, ibyo leta y’u Rwanda ihakana. Kigali na yo ishinja Kinshasa gufatanya n’umutwe wa FDLR urwanya u Rwanda ukorera mu burasirazuba bwa DR Congo, ibyo Kinshasa na yo yahakanye.

Judith Suminwa ni Minisitiri wa mbere w’umugore ukuriye leta mu mateka y’iki gihugu. Leta ye igizwe ahanini n’abo mu ihuriro Union Sacrée risanzwe ku butegetsi, ibi bituma abasesenguzi bamwe bavuga ko nta mpinduka nini zitezwe muri politike isanzwe ya leta ku kibazo cya M23 n’uburasirazuba bw’igihugu.

Judith Suminwa Tuluka, w’imyaka 56, avuka mu ntara ya Kongo-Central, afite impamyabumenyi mu bijanye n’ubukungu ya Université Libre de Bruxelles (ULB) mu Bubirigi. Ni umubyeyi ufite abana babiri.

Ni we mugore wa mbere ubaye minisitiri w’intebe muri iki gihugu kuva cyabona ubwingenge mu 1960. Amaze guhabwa uyu mwanya, yatangaje ko ataje muri politike “kwikungahaza” ahubwo aje “gukora ngo ngeze ku mahoro n’ubumwe bwa Congo”.

Nyuma y’igihe kinini nk’umukozi w’ishami ry’Umuryango w’Abibumbye ryita ku iterambere (UNDP/PNUD) Suminwa yinjiye muri politike nk’umukuru wungirije w’inama igira inama perezida wa DR Congo ku ikoreshwa ry’ingengo y’imari. Kugeza icyo gihe ntiyari umuntu uzwi na benshi muri DR Congo.
Mu 2023 nibwo yamenyekanye ubwo yagirwaga Ministiri w’igenamigambi muri leta ya kabiri ya Sama Lukonde, ari nawe ubu yasimbuye ku mwanya wa minisitiri w’intebe.