Minisiteri y’Ubuzima muri Libani yatangaje ko abantu 39 bishwe n’ibitero bikomeye Israel yongeye kugaba muri iki gihugu mu gihe cy’umunsi umwe gusa.
Ni ibitero Israel yagabye ku wa Gatandatu tariki 09 Gicurasi 2026 byibasiye Amajyepfo ya Libani.
Kamwe mu duce twibasiwe ni umujyi wa Saksakiyeh uri mu Majyepfo ya Libani. Ibitero byahagabwe byahitanye nibura abantu barindwi, barimo umwana umwe, nk’uko Minisitiri y’Ubuzima yabitangaje.
Ingabo za Israel, IDF, zatangaje ko zari zigambiriye kurasa abarwanyi b’umutwe wa Hezbollah, kandi ko zamenyeshejwe amakuru y’uko hari abasivili batari bafite aho bahuriye n’imirwano bahungabanyijwe n’ibitero byayo.
Kuva ku wa 16 Mata 2016 Perezida wa Amerika,Donald Trump yatangaje agahenge hagati ya Israel na Libani, ariko ntikubahirijwe kuko Israel na Hezbollah bakomeje kurasana.
Ibitero byinshi bya Israel byo mu kirere bikomeje kwibasira Amajyepfo ya Libani, aho igisirikare cya Israel kivuga ko kirimo kugaba ibitero ku bikorwa remezo no ku bantu bafitanye isano na Hezbollah, umutwe ushyigikiwe na Iran kandi ufite ibikorwa bya gisirikare ndetse na politiki muri Libani.
Umutwe witwaje intwaro wa Hezbollah winjiye mu ntambara na Israel ku wa 02 Werurwe 2026, avuga ko uje guhorera abayobozi bakuru ba Iran baguye mu bitero Israel na Leta Zunze Ubumwe za Amerika byagabye kuri Iran ku wa 28 Gashyantare 2026, Israel na yo usubiza irasa mu bice bitandukanye byo muri Libani harimo n’umurwa mukuru Beirut.
Kuva iyi ntambara yatangira abaturage barenga 2.600 baburiye ubuzima muri iya ntambara, 8.000 barakomereka, ni mu gihe abarenga miliyoni 1.2 bavuye mu byabo.
Umutwe wa Hezbollah mu bihe bitandukanye wakomeje gutangaza ko utazarambika intwaro hasi mu gihe Ingabo za Israel zikibarizwa ku butaka bwa Libani.
Mu biganiro Iran ikomeje kugirana na Leta Zunze Ubumwe za Amerika bigamije gusinya amasezerano yo guhagarika intambara, Iran isobanura ko guhagarika intambara muri Iran bigomba kujyana no guhagarika ibitero Israel ikomeje kugaba ku baturage ba Libani n’umutwe wa Hezbollah.
What do you feel about this post?
Like
Love
Happy
Haha
Sad
