Indege ya gisivili yo mu bwoko bwa Antonov An-2 yari itwaye abantu barindwi barimo umusirikare wa Repubulika Iharanira Demokarasi ya Congo ufite ipeti rya Colonel n’umugore we, yagonze igiti, batandatu bahasiga ubuzima.
Iyi ndege yavaga mu gace ka Lubutu mu ntara ya Maniema yerekeza muri Tshopo, yakoze impanuka isigaje urugendo rw’ibilometero 34 ngo igere ku kibuga mpuzamahanga cy’indege cya Kisangani.
Amashusho yakwirakwiye ku mbuga nkoranyambaga agaragaza Colonel wayoboraga batayo muri teritwari ya Punia muri Maniema yambaye impuzankano y’igisirikare ndetse na bote, ari kumwe n’umugore we wambaye ikanzu y’umutuku.
Mbere yo kwinjira muri iyi ndege, uyu musirikare n’umugore we babanje kuganira n’abasikare bari ku kibuga cy’indege cya Lubutu, bigaragara ko bari babishimiye, hanyuma barabasezera.
Urugendo rwabo ntirwagenze neza kuko nyuma y’iminota mike iyi ndege ihagurutse muri Lubutu, yogonze igiti, igwa mu ishyamba, ihita igurumana.
Amakuru ava mu ishami rya Polisi rishinzwe iperereza agaragaza ko mu bapfuye harimo abanyamahanga babiri, barimo umupilote ukomoka muri Ukraine wari uyitwaye ndetse n’umwuganizi we.
Pasiporo yatoraguwe ahabereye iyi mpanuka igaragaza ko uyu mupilote yitwa Stepankov Yuriy, akaba yaravutse muri Mata 1961.
Uwarokotse iyi mpanuka ni umwe mu barinzi ba Colonel bari bamuherekeje kuri iyi ndege.
Bitewe n’uko iyi ndege yagurumanye, batanu bahiye barakongoka. Habonetse umurambo umwe wa enjenyeri wari ushinzwe gufasha umupilote mu bibazo bya tekiniki.
Antonov zikorera muri RDC zakozwe mu bihe by’Ubumwe bw’Abasoviyete. Abasirikare basobanuye ko iyi yari imaze amezi menshi ku kibuga cy’indege cya Lubutu idakoreshwa.
What do you feel about this post?
Like
Love
Happy
Haha
Sad
