DJ Toxxyk yasubijwe mu Igororero rya Nyarugenge.

Nyuma y’iminsi 18 asohotse mu igororero rya Nyarugenge i Mageragere, DJ Toxxyk yongeye gusubizwayo kuri uyu wa 22 Gicurasi 2026.

DJ Toxxyk yajyanywe mu igororero rya Nyarugenge ku wa 22 Gicurasi 2026 nyuma yo gukatirwa n’Urukiko Rwisumbuye rwa Nyarugenge igifungo cy’umwaka umwe n’igice n’ihazabu ya 1.050.000Frw.

Amakuru yizewe ahamya ko DJ Toxxyk wari wararekuwe ku wa 4 Gicurasi 2026 yageze mu Igororero rya Nyarugenge ku wa 22 Gicurasi 2026.

Kuri uyu wa 22 Gicurasi 2026, Urukiko Rwisumbuye rwa Nyarugenge rwakatiye Shema Arnaud de Bosscher wamamaye mu kuvanga umuziki nka DJ Toxxyk igifungo cy’umwaka n’amezi atandatu no kwishyura ihazabu ya 1.050.000 Frw nyuma yo kumuhamya ibyaha byose yashinjwaga.

Ibyaha DJ Toxxyk yari akurikiranyweho birimo ubwicanyi budaturutse ku bushake, gukora ibikorwa byerekeye ibiyobyabwenge cyangwa urusobe rw’imiti ikoreshwa nkabyo, guhunga umaze gukora cyangwa guteza impanuka n’icyaha cyo kwanga gupimishwa icyuma gipima alcohol.

Ibi byaha bifitanye isano n’impanuka DJ Toxxyk yakoreye mu Karere ka Nyarugenge mu rukerera rwa tariki ya 20 Ukuboza 2025, yaguyemo umupolisi, urugo rwe rukanasangwamo urumogi ubwo hakorwaga iperereza.

DJ Toxxyk yagabanyirijwe igihano cyane kuko umucamanza yavuze ko urukiko rwari rwasanze akwiye guhanishwa igifungo cy’imyaka ine n’amezi atandatu ndetse n’ihazabu ya 1.050.000Frw.

Bijyanye no kuba DJ Toxxyk yaraburanye yemera ibyaha byose ndetse anabisabira imbabazi, bikaba ari n’ubwa mbere yari akatiwe n’inkiko, rwamugabanyirije igihano gishyirwa ku mwaka umwe n’amezi atandatu ndetse n’ihazabu ya miliyoni 1.050.000Frw.