AFC/M23 yarahiriye gusunikira ihuriro ry’ingabo za Leta ya RDC kure

Ihuriro AFC/M23 rirwanya ubutegetsi bwa Repubulika Iharanira Demokarasi ya Congo ryarahiriye gusunikira kure ihuriro ry’ingabo za Leta rikomeje imyiteguro y’intambara ngari mu burasirazuba bw’iki gihugu.

Ubu butumwa bwatanzwe n’Umuvugizi wa M23 mu rwego rwa gisirikare, Lieutenant Colonel Willy Ngoma, kuri uyu wa 12 Kanama 2025, mu gihe AFC ikomeje kugaragaza ko ingabo za Leta n’imitwe bikorana bikomeje kurenga ku gahenge.

Lt Col Ngoma yagize koKwiyubaka kw’ihuriro rigamije ikibi mu bijyanye n’intwaro ndetse n’abasirikare kugaragaza umugambi w’iyi Leta wo kugaba ibitero bigari.

Umuvugizi wa AFC/M23, Lawrence Kanyuka, kuri uyu wa 12 Kanama yatangaje ko Leta ya RDC ikomeje kohereza ingabo ndetse n’abarwanyi b’imitwe yitwaje intwaro irimo FDLR mu burasirazuba bw’igihugu.

Yasobanuye ko indege y’ubwikorezi ya Antonov yavanye abasirikare ba RDC n’intwaro ziremereye muri Kisangani inshuro eshanu, ibajyana muri teritwari ya Walikale mu ntara ya Kivu y’Amajyaruguru.

Ku wa 11 Kanama, AFC/M23 na bwo yari yatangaje ko mu duce twinshi rwo mu burasirazuba bwa RDC turimo Nzimbira, Bunyakiri, Mwenga na Uvira mu ntara ya Kivu y’Amajyepfo na Kibua na Pinga muri Walikale, hagaragaye abasirikare benshi bari kwitegurra intambara.

AFC/M23 yasobanuye ko tariki ya 10 Kanama, ubwato bubiri bwari butwaye abasirikare 1125 ba Leta ya RDC bwabagejeje muri teritwari ya Uvira, bubavanye mu mujyi wa Kalemie mu ntara ya Tanganyika.

Kanyuka yatangaje ko ingendo z’aba basirikare ziri kujyana n’ibitero ihuriro ry’ingabo za Leta rikomeje kugaba mu bice bituwe cyane mu burasirazuba bwa RDC, bigateza impfu, inkomere no guhunga kw’abaturage.

Tariki ya 19 Nyakanga, Leta ya RDC na AFC/M23 byashyize umukono ku mahame ngenderwaho agana ku masezerano y’amahoro. Mu ngingo impande zombi zumvikanyeho harimo guhagarika imirwano burundu ariko ntizubahirizwa.

Byari byarateganyijwe ko impande zombi zizatangira ibiganiro by’amahoro bishingiye kuri aya mahame bitarenze tariki ya 8 Kanama. Leta ya Qatar ihuza AFC/M23 na Leta ya RDC ntacyo iratangaza.