Abakinnyi babiri bashya ba APR FC bakuwe ku rutonde rw’Ikipe y’Igihugu ya Uganda

Paul  Put Umutoza w’Ikipe y’Igihugu ya Uganda, yakuye Denis Omedi na Hakim Kiwanuka mu bakinnyi iki gihugu kizifashisha muri CHAN 2024 nyuma y’uko bombi bamaze gusinyira APR FC.

Uganda Cranes yatangiye umwiherero kuri uyu wa Mbere, tariki ya 13 Mutarama, yitegura CHAN 2024 izakira hamwe na Kenya na Tanzania tariki ya 1-28 Gashyantare 2025.

Mu gihe abakinnyi bari bamaze iminsi itatu bitoza, kuri ubu bagabanyijwe hasigara 28 bazaba hamwe muri Cranes Paradise Hotel i Kisasi.

Mu bakinnyi barindwi bakuwe ku rutonde harimo Denis Omedi na Hakim Kiwanuka, bombi baheruka gusinyira APR FC, bityo bakaba batemerewe gukina iri rushanwa.

Amakuru avuga ko APR FC yamaze gusaba ITC (International Transfer Certificate) yo kugura aba bakinnyi, ndetse bidasubirwaho yamaze kubegukana.

Uganda yari yifuje ko APR yareka Omedi na Kiwanuka bakayikinira CHAN, bakazaza mu Rwanda ariko Impuzamashyirahamwe y’Umupira w’Amaguru muri Afurika (CAF), igaragaza ko ibyo bitashoboka kandi baramaze gusabirwa ibyangombwa mu kindi gihugu.

Abakinnyi basezerewe mu Ikipe y’Igihugu ya Uganda ni Moses Aliro, Walter Ochora, Ibrahim Thembo, Brian Ijara na Isma Magala mu gihe Milton Karisa na Sadat Anaku bakuwe ku rutonde kubera imvune.

Urutonde  rw’abakinnyi ba Uganda bari mu mwiherero:

Abanyezamu: Hannington Ssebwalunyo (NEC FC), Mutwalibi Mugolofa (KCCA FC), Joel Mutakubwa (BUL FC) na Crispas Kusiima (Kitara FC).

Ba myugariro: Gavin Kizito Mugweri (KCCA FC), Gideon Odongo (NEC FC), Derrick Ndahiro (Vipers SC), Enock Walusimbi (URA FC), Arnold Odong (SC Villa), Rogers Torach (Vipers SC), Hillary Mukundane (Vipers SC), James Begisa Penza (URA FC), Nicholas Mwere (BUL FC) na Paul Patrick Mbowa (Vipers SC).

Abakina hagati: Enock Ssebagala (NEC FC), Joel Sserunjogi (KCCA FC), Emmanuel Wasswa (Express FC), Ronald Ssekiganda (SC Villa), Allan Okello (Vipers SC), Saidi Mayanja (KCCA FC) na Patrick Jonah Kakande (SC Villa).

Ba rutahizamu: Arafat Usama (KCCA FC), Jude Ssemugabi (Kitara FC), Shafik Nana Kwikiriza (KCCA FC), Paul Mucureezi (NEC FC), Isaac Ogwang (Police FC), James Bogere (Masaka Sunshine FC) na Charles Lwanga (SC Villa).