MINISPORTS igiye gukemura ikibazo cy’abakinnyi b’amagare basabwe gusubiza ayo bitorezagaho

Minisiteri ya Siporo yijeje gukurikirana ibibazo byatangajwe n’abakinnyi b’umukino w’amagare, bavuze ko badafite amahirwe yo kwitabira amarushanwa, ndetse ko bahura n’ibibazo mu myitozo yabo, kandi hari amagare yakuweho yari yaratanzwe n’Ishyirahamwe ry’Umukino w’Amagare (FERWACY).

Umunyamabanga Uhoraho muri Minisiteri ya Siporo, Nelly Mukazayire, aherutse gusura ikigo cya UCI gishinzwe imyitozo y’umukino w’amagare mu Rwanda, giherereye mu Karere ka Musanze.

Nyuma y’uru ruzinduko, Munyaneza Didier ‘Mbappe,’ umwe mu bakinnyi b’Ikipe y’Igihugu y’Amagare, yasobanuye ko mu bibazo bikwiye kwitabwaho harimo kubaha amagare abafasha mu myitozo.

Yagize ati: “Mu gihe nteganya gusubira mu Bufaransa, nasabye igare muri FERWACY kugira ngo nkomeze imyitozo, harimo no guhagararira Ikipe y’Igihugu nk’uko bisanzwe. Ariko nyuma ya Shampiyona Nyafurika, bansabye kugarura igare nakoreshaga kuko hari mugenzi wacu wagaragaje ibitagenda neza.”

Mu gusubiza iki kibazo, FERWACY yagize iti: “Turacyatekereza ku kibazo cyagaragajwe gusa nta marushanwa y’Ikipe y’Igihugu duteganya mu Bufaransa, kandi nta busabe bwo kwaka igare ry’ikipe y’igihugu twigeze duhabwa.”

Minisiteri ya Siporo nayo ibinyujije ku mbuga nkoranyambaga yamenyesheje umunyamakuru Jado Castar ko ikibazo yacyumvise kandi ko igiye kugikemura.

Bagize bati: “Ibibazo n’ibitekerezo bitangwa n’abakinnyi n’abahoze bakina amagare turimo kubikurikirana kandi turi gufatanya na FERWACY ngo bigezwe ku gisubizo cyiza.”

Abakinnyi nka Munyaneza bamaze gusubiza amagare yabo y’imyitozo nyuma yo kugaruka muri Shampiyona Nyafurika, mu gihe Mugisha Moïse na we yari amaze kuyasubiza nyuma yo kwitabira Kirehe Race.

Ibi bikorwa kuko amakipe yo mu Rwanda usanga atabasha gutanga amagare agezweho yifashishwa n’abakinnyi ku rwego mpuzamahanga.

Mu busanzwe, abakinnyi b’Ikipe y’Igihugu bafashwa kubona amagare yo kwitorezaho binyuze mu busabe bwihariye, kugira ngo igihe cyose bazakenerwa n’Ikipe y’Igihugu bazabe bari ku rwego rwiza.