Murekatete wigeze kuyobora Rutsiro yeruye ko Dosiye ya Rwamucyo yari ibarenze

Murekatete Triphose wahoze ayobora akarere ka Rutsiro, utaherukaga kuvugwa mu itangazamakuru kuva Inama njyanama y’akarere yaboraga yaseswa na Perezida wa Repubulika, yavuze byinshi mu nzira y’umusaraba yanyuzemo ariko yageze kuri Dosiye ya Rwamucyo n’imicanga arababwa avuga ko yari irenze ubushobozi bw’akarere.

Murekatete Triphose aherutse kugaragara mu itangazamakuru ameze nkugambiriye kuvuguruza amwe mu makuru yamuvuzweho, urugero ni nko Mu kiganiro cyatambutse kuri Ukwezi TV, aho yabajijwe ku bibazo by’Umushoramari Rwamucyo Juvenal akavuga ko bari inshuti, ariko iby’imicanga byari birenze akarere.

Rwamucyo Juvenal ufite ikigo cya Quarrying Company Ltd, mu kiganiro yahaye Rwandanews24 mu kwezi kwa Kanama mbere ho isaha imwe ko Inama njyanama ya Rutsiro iseswa, yavuze ko mu karere ka Rutsiro uretse kumwimisha ibyangombwa hanabayeho guhisha Dosiye ze, birengagiza ko hari izindi yageneye Kopi.

Icyo gihe yavuze ko nyuma yo kurengwanywa n’akarere, RMB yari yarageneye Kopi yamugiriye inama yo kujuririra Inama njyanama y’akarere, ariko mu nshuro 4 zose basuzumye ikibazo cye basangaga yujuje ibisabwa ariko imyanzuro yagera kwa  Guverineri uwo mwanzuro akawutera ipine.

Murekatete Triphose wahoze ayobora Akarere ka Rutsiro na Habitegeko François kumwimisha uruhushya rwo gucukura umucanga mu mugezi kandi yari yujuje ibisabwa.

Murekatete Triphose muri iki kiganiro yakoreye kuri Shene ya Youtube, yavuze ko ntacyo apfa na Rwamucyo, ahubwo yakagombye kuba ari n’inshuti ye cyane.

Ati “Rwamucyo n’umurinzi w’igihango muri Rutsiro, nanjye nkaba umurinzi w’igihango wambikiwe umudari muri Rubavu. Ikibazo cyabayeho hagati ya dosiye ya Rwamucyo n’ibyo banyitirira.”

Akomeza agira ati kandi “Dosiye y’imicanga yari irenze urwego rwanjye kandi hejuru hari urwego rwagombaga kubikemura.”

Mbere y’uko ku wa 28 Kamena 2023 ibiro bya Minisitiri w’Intebe bisohora itangazo risesa Inama Njyanama y’Akarere ka Rutsiro, mu biro by’aka Karere habanje guhwihwiswa amakuru y’imikorere n’imikoranire mibi hagati mu babikoreramo.

Ibiro bya Minisitiri w’Intebe byasobanuye ko impamvu Inama Njyanama ya Rutsiro yasheshwe ari uko ubuyobozi bw’Akarere bwateshutse ku nshingano.

Murekatete Triphose wavuze ko afite uburambe mu nzego z’ibanze, bw’imyaka irenga 22 yatorewe kuyobora Akarere ka Rutsiro tariki 19 Ugushyingo 2021, akurwa kuri izo nshingano tariki 28 Kamena 2023.

Murekatete Triphose wigeze kuyobora Rutsiro yeruye ko ikibazo cya Rwamucyo cyari kirenze akarere