Kigali: Bafatanywe amasashe ibihumbi 80

Ku mugoroba wo ku Cyumweru tariki ya 29 Nzeri 2024, Polisi y’u Rwanda, Ishami rishinzwe kurwanya magendu n’ibindi byaha (ASOC), yafatiye mu Karere ka Kicukiro abantu babiri bashinjwa kwinjiza amasashe mu gihugu no kuyakwirakwiza.

Aba bantu, umugore w’imyaka 24 n’umusore w’imyaka 19, bafatiwe mu Mudugudu w’Amahoro, Akagari ka Karembure mu Murenge wa Gahanga, bafite amasashe ibihumbi 80 bari barimo gushakira abakiriya.

Chief Inspector of Police (CIP) Wellars Gahonzire, umuvugizi wa Polisi mu Mujyi wa Kigali, yavuze ko abafashwe bafatiwe ku makuru yatanzwe n’abaturage batuye muri aka gace.

Abaturage babonye aba bantu bafite imifuka ipakiyemo amasashe hafi y’urugo, bikekwa ko bari bategereje umukiriya uza kuyatwara. Polisi yahise itabara ibasangana amapaki 400 arimo amasashe ibihumbi 80, bahita batabwa muri yombi.

Nyuma yo gufatwa, aba bantu biyemereye ko amasashe bari bayakuye muri Uganda bifashishije inzira zitemewe zambukiranya umupaka, kandi ko atari ubwa mbere binjizaga amasashe mu gihugu. CIP Gahonzire yashimiye abaturage batanze amakuru yatumye aba bantu bafatwa, asaba ko abantu bose bakora ibikorwa binyuranyije n’amategeko babimenyeshwa inzego z’umutekano.

Polisi y’u Rwanda yihanangirije abishora mu bucuruzi bwa magendu, ibibutsa ko itegeko N° 17/2019 ryo ku wa 10/08/2019 ribuza kwinjiza no gukoresha amasashe n’ibikoresho bikozwe muri pulasitiki bikoreshwa inshuro imwe.

Ingingo ya 10 y’iryo tegeko ivuga ko umuntu utumiza amasashe mu mahanga ahanishwa kwamburwa ayo masashe no kwishyura ihazabu ingana n’inshuro icumi z’agaciro k’ayo masashe. Ingingo ya 11 ivuga ko uranguza amasashe ahanishwa ihazabu ya 700.000 FRW.

Polisi ikomeza gushishikariza abantu kwirinda ibikorwa binyuranyije n’amategeko, cyane cyane ubucuruzi bwa magendu n’ibindi bicuruzwa bitemewe, kuko ibikorwa byo kubafata bizakomeza mu bufatanye n’abaturage n’izindi nzego.