Muhanga: Umukozi wa Sacco yasohowe mu Biro afashwe mu mashati

Umukozi wa Sacco Dukire Nyarusange, Habinshuti Alexandre, yirukanwe mu buryo budasanzwe n’umucungamutungo wa Sacco, Twagiramariya Grace. Habinshuti avuga ko manager wategetse ushinzwe umutekano kumusohora mu biro amufashe mu mashati, akamujugunya hanze.

Habinshuti yari amaze igihe akora muri Sacco Dukire Nyarusange adafite amasezerano ahoraho. Ibi byatangiye kumera nabi ubwo hasohokaga urutonde rw’abagomba gukora ikizamini cy’umwanya yari asanzwe akoraho. Uru rutonde rwagaragazaga ko hazakorwa ikizamini tariki ya 26 Nyakanga 2024, ariko Habinshuti hamwe na mugenzi we baje kumenya amakuru y’uko gukorera ikizamini ari ukurenzaho kuko akazi kari gafite uzagahita agakorera, uwo mugenzi wabo uri kuri lisiti y’abazakora ikizamini.

Habinshuti yanze kujya gukora ikizamini kuko yari yamenye ko hazabaho uburiganya. Mu gitondo cyo ku wa Mbere w’iki Cyumweru, yaje mu kazi nk’ibisanzwe, ariko manager wa Sacco, Twagiramariya Grace, ahita ategeka ushinzwe umutekano kumujugunya hanze. Habinshuti arasaba ubutabera kuko yarahohotewe ndetse n’isura ye yarangijwe mu baturage kuko yari azwi nk’umuntu wiyubashye.

Abaturage baganiriye na TV1 banenze imyitwarire y’umucungamutungo wa Sacco. Umwe yagize ati, “Ikintu kirushijeho kutubabaza ni ukumva ko umuntu yagusohoye mu kazi agifashe mu mashati. Birababaje.”

Umunyamakuru wa TV1 yagerageje kuvugana na manager w’iyi Sacco ariko ntiyaboneka. Twizerumukiza John uyobora iyi Sacco yavuze ko bategereje ibaruwa y’uwahohotewe kugira ngo ikibazo cye gikurikiranwe.