Umubare w’abana Dorimbogo asize watummye benshi bagwa mu kantu

Ku mugoroba wo ku wa Gatandatu tariki 27 Nyakanga 2024, ni bwo inkuru yabaye kimomo ko umuhanzi Nyiransengiyumva Valentine wamamaye nka ‘Vava’ cyangwa ‘Dorimbogo’ ku mbuga nkoranyambaga, yitabye Imana azize uburwayi. Nyuma y’urupfu rwe, hamenyekanye ko asize abana babiri b’abahungu, n’ubwo atari yarigeze abavugaho na rimwe.

Aya makuru yamenyekanye binyuze mu kiganiro kirambuye umubyeyi wa Dorimbogo yagiranye n’umunyamakuru wa Shene ya YouTube yitwa Urugendo TV, ndetse n’umwana w’imfura wa Vava yari ahari. Uyu mubyeyi wavuze ko yashenguwe cyane n’urupfu rw’umukobwa we, yavuze ko n’ubwo yitabye Imana asize abamukomotseho babiri, umukuru afite imyaka 11 mu gihe umukurikira afite imyaka 8.

Umubyeyi wa nyakwigendera yavuze ko n’ubwo nta muntu wari warigeze yemeza aya makuru y’uko umukobwa we afite abana, ni impamo koko kuko afite abana babiri. Umwe (mukuru) barabana, mu gihe undi w’imyaka 8 abana na Se mu Mutara. Uyu mukuru, wari muri iki kiganiro, yavuze ko yitwa Niyonzima Fridaus akaba afite imyaka 11, yiga mu wa gatatu w’amashuri abanza.

Yakomeje avuga ko n’ubwo hari abashakaga kuvuga kuri aya makuru biyita abahanuzi batari bafite ukuri neza, nyakwigendera ntiyakundaga kuvuga ku bana be cyane. Nta n’ubwo yakunze kubana nabo kuko yajyaga gushaka amafaranga akaboherereza nyuma y’uko mu cyaro yabonye atazahashobora kubera ubuzima bubi yabagamo. Nyuma y’uko abyaye umwana wa mbere afite imyaka 18 gusa, aho yahohotewe n’umugabo wari ufite umugore, yahisemo kugenda gushaka ubuzima.

Icyakora ngo n’ubwo Vava Dorimbogo atabarutse afite abana babiri, yabitagaho cyane kuko yakoraga ibishoboka byose akaboherereza amafaranga bifashishaga mu kugura ibikenewe byose, cyane cyane uyu wabanaga na nyirakuru (ubyara nyina). Uyu mubyeyi yavuze ko ntacyo yashinja nyakwigendera kuko yakoze ibishoboka byose akajya ahahira abana be, n’ubwo atahiriwe n’abagabo bose babyaranye.

Inkuru bijyanye: Umuhanzikazi Valentine wamamaye nka Dorimbogo yitabye Imana