Perezida wa Amerika Joe Biden yasabwe guhagarika ibikorwa byo kwiyamamaza

Aba-Démocrates 35 bari mu Nteko Ishinga Amategeko ya Leta Zunze Ubumwe za Amerika basabye Perezida Joe Biden guhara kandidatire ye mu matora y’Umukuru w’Igihugu, agasimburwa na Visi Perezida Kamala Harris.

Mu bayoboke b’ishyaka riri ku butegetsi harimo abagera kuri 13 bafashe icyemezo cyo gusaba Perezida Biden kuva mu irushanwa kuri uyu wa 19 Nyakanga 2024, biganjemo abakorana na Nancy Pelosi wabaye Perezida w’Inteko.

Abasenateri bane bo muri iri shyaka barimo Sherrod Brown, Peter Welch, Martin Heinrich na John Tester, bamaze gusaba Perezida kuva muri iri hatana. Sherrod Brown yagize ati:

“Ndemeranya n’abo muri Ohio benshi bangejejeho ibitekerezo. Muri ibi bihe bikomeye, dukwiye kwibanda kuri ibi bibazo bikomeye. Ntekereza ko Perezida akwiye guhagarika ihatana.”

Biden yashyizweho igitutu nyuma yo gutsindwa na Donald Trump mu kiganiro mpaka cyabereye kuri televiziyo CNN tariki ya 28 Kamena 2024. Ibi byakurikiwe n’ibibazo byo kwibagirwa cyane, kwitiranya abantu n’ibintu no kunanirwa kurira ingazi z’indege y’Umukuru w’Igihugu.

Perezida Biden yanenze abakomeje ubu bukangurambaga, avuga ko adateze kuva mu ihatana. Yavuze ko afite imbaraga zo guhatana na Trump kandi akamutsinda, akayobora Amerika neza kurusha undi wese.

Mu gihe umubare w’abagize Inteko bo mu ishyaka ry’Aba-Démocrates bamusaba kwikura mu ihatana wiyongera, televiziyo NBC yatangaje ko Biden yababaye, abagereranya n’abagambanyi. Amatora ya Perezida wa Amerika ateganyijwe mu Ugushyingo 2024, aho Donald Trump ahabwa amahirwe yo kuyatsinda, mu gihe Biden yaba adasimbujwe undi mukandida.