Yakatiwe igifungo azira gutwika ifoto ya Perezida

Umusore w’imyaka 24  witwa Shadrack Chaula,uzwi cyane mu gushushanya, yakatiwe gufungwa imyaka ibiri nyuma yo guhamwa n’icyaha cyo gutwika ifoto ya Perezida wa Tanzania, Samia Suluhu Hassan.

Benjamin Kuzaga, Umuyobozi wa polisi mu Karere ka Rungwe, yatangaje ko Chaula yatawe muri yombi tariki ya 30 Kamena nyuma yo gushyira amashusho ku rubuga rwe rwa TikTok agaragaza atwika ifoto y’Umukuru w’Igihugu. Kuzaga yavuze ati, “Ntabwo ari umuco w’abantu bo muri ‘Mbeya’ kutubaha umukuru w’igihugu cyacu.”

Chaula yahamijwe icyaha cyo kutubaha umukuru w’igihugu, akaba yarakatiwe imyaka ibiri y’igifungo ndetse n’ihazabu ya 2000$.

Nubwo yahamijwe iki cyaha, umunyamategeko we avuga ko nta tegeko ribaho mu mategeko y’igihugu rihana uwatwitse ifoto y’umukuru w’igihugu, bikaba byatumye habaho impaka ku buryo iki cyemezo cy’ubutabera cyafashwe.

Iki gihano cyashyizweho gisa nk’ikigamije gutanga ubutumwa ku baturage ko gukorera ibikorwa byo gusuzugura abayobozi b’igihugu bitazihanganirwa. Mu gihe Chaula ahanishijwe iyi myaka ibiri y’igifungo, biragaragara ko uburenganzira bwo gutanga ibitekerezo muri Tanzania bukomeje kuba ikibazo gikomeye, cyane cyane iyo ibyo bitekerezo bisa nk’ibishyira mu kaga icyubahiro cy’abayobozi bakuru b’igihugu.