Nyuma y’uko abigaragambya banze umushinga w’itegeko ryo kuzamura imisoro yahinduye undi muvuno

Perezida wa Kenya, William Ruto, yatangaje ko iki gihugu kigomba kuguza amafaranga menshi kugira ngo guverinoma ikomeze yiyubake nyuma y’uko abigaragambya banze umushinga w’itegeko ryo kuzamura imisoro.

Ibi Ruto yabivuze nyuma y’uko yari yasezeranyije gukuraho uwo mushinga w’itegeko nyuma y’imyigaragambyo yari yigabije inteko ishinga amategeko muri Kenya. Kubera izo mpamvu, Ruto yavuze ko Kenya igomba kuguza miliyoni 7.6 $ z’amadolari ya Amerika kugira ngo yunganire guverinoma izibe icyuho cy’ubukungu ifite.

Ruto yavuze kandi ko atekereza kugabanya amafaranga yakoreshejwe muri guverinoma ndetse no mu biro bye, utibagiwe no kugabanya amafaranga yagenerwa ubucamanza n’ubuyobozi bw’intara. Iyo iri tegeko ryemerwa, ku ikubitiro guverinoma ya Kenya yari gukusanya imisoro y’inyongera hafi miliyari 350 z’amashiringi ya Kenya. Nk’uko Perezida Ruto abitangaza, ingamba z’imisoro ziteganijwe zari mu rwego rwo kugabanya umutwaro w’amadeni arenga miliyari 80 z’amadorari ya Amerika.

Imyigaragambyo imaze iminsi muri iki gihugu yateguwe ishyirwa mu bikorwa n’urubyiruko rw’abasore n’inkumi bavutse kuva muri 2000. Imibare igaragaza ko abarenga 20 biciwe muri iyo myigaragambyo abandi amagana barakomereka.