Kandida Perezida Mpayimana Philippe yavuze ko azazamura ingengo y’imari yihariye ku mikino mu Mirenge

Umukandida wigenga ku mwanya wa Perezida wa Repubulika, Mpayimana Philippe, yatangaje ko, aramutse atorewe kuyobora u Rwanda, azashyiraho ingengo y’imari ku rwego rw’Umurenge izajya ikoreshwa mu marushanwa ategurwa mu rwego rwo kurushaho gushaka impano z’abakiri bato ndetse no kubona ibihembo ku makipe yitabira amarushanwa.

Mpayimana yabitangaje kuri iki Cyumweru tariki ya 23 Kamena 2024, ubwo yagezaga imigabo n’imigambi ye ku baturage bari bateraniye ku kibuga cy’umupira cya Nyamirama mu Karere ka Kayonza, aho yakomereje ibikorwa byo kwiyamamariza kuyobora u Rwanda mu myaka itanu iri imbere.

Ingengo y’Imari ku rwego rw’Umurenge

Mpayimana Philippe yavuze ko hari icyuho n’ikibazo cy’amikoro make ashyirwa mu mikino, bityo nk’urwego rw’Umurenge rwegereye abaturage rukwiye kugira ingengo y’imari. By’umwihariko, hakenewe ingengo y’imari igomba gushyirwa mu gushaka impano z’abana bato no gushyiraho ibihembo by’amafaranga bifatika ku bitabira amarushanwa ategurwa n’Umurenge mu rwego rwo gutera ingabo mu bitugu n’imbaraga abakina imikino.

Yagize ati: “Nta ngengo y’imari y’imikino ihari yateganyijwe ndetse rimwe na rimwe abayobozi bo mu Nzego z’ibanze ntibitabira iyi mikino kuko nta bihembo biba birimo. Hari icyuho niba Akagari gashobora kwegukana irushanwa ryateguwe kakabura n’ishimwe ry’amafaranga 5,000, bigaragara nabi kandi ntibyateza impano imbere.”

Yakomeje agira ati: “Wazagira Mbape, Messi cyangwa Christiano Ronaldo ryari niba nta bana bakiniye mu Kagari n’ahandi habegereye ngo bagaragaze impano zabo? Ni yo mpamvu dusaba ko imikino ihabwa ingengo y’imari mu rwego rw’Umurenge.”

Guhindura Izina ry’Ikipe y’Igihugu ‘Amavubi’

Mpayimana Philippe yavuze ko aramutse atorewe kuba Perezida yasaba ko izina ry’Ikipe y’Igihugu ‘Amavubi’ ryahinduka, kuko ritanga umusaruro muke. Yagize ati: “Njye nasaba ko izina turihindura kuko ubanza Amavubi ataruma neza, ni yo mpamvu twazashaka izina rituma Igihugu cy’u Rwanda kigira ikipe ifite uburemere nk’Intare, Ingwe, Inzovu n’andi, kandi ntitugatinye impinduka zagirira akamaro Abanyarwanda.”

Mpayimana Philippe yashimiye abaturage ba Kayonza bitabiriye ibikorwa byo kwiyamamaza kwe kugira ngo bumve imigabo n’imigambi ye bizabafashe guhitamo ukwiye kubayobora u Rwanda mu myaka itanu iri imbere.