U Rwanda rugiye kwakira inama mpuzamahanga y’abagaba b’ingabo zirwanira ku butaka

U Rwanda rugiye kwakira Inama Mpuzamahanga y’Abagaba b’Ingabo zirwanira ku butaka, yateguwe n’Ingabo z’u Rwanda (RDF) izaba iba ku nshuro ya kabiri.

Iyi nama izabera i Kigali kuva ku wa 21 kugeza ku wa 22 Ukwakira 2025, ifite insanganyamatsiko igaruka ku “gukoresha ubushobozi bw’ingabo zirwanira ku butaka mu kuzamura ishyirwa mu bikorwa ry’ingamba z’amahoro n’umutekano.”

Itangazo RDF yashyize hanze rivuga ko iyi nama yo ku rwego rwo hejuru izahuza abagaba b’ingabo zirwanira ku butaka bazaturuka muri Afurika n’ahandi ku Isi.

Rirakomeza riti “Yerekana umuhate u Rwanda rufite mu guteza imbere ubufatanye mu bya gisirikare, kujya inama, kubungabunga amahoro n’umutekano, no gusangira ubunararibonye mu by’imiyoborere y’ingabo ku Mugabane w’Afurika.”

Ni inama izaba urubuga rukomeye ku bayobozi b’ingabo rwo kungurana ibitekerezo, gushimangira ubufatanye, no gusuzumira hamwe uburyo bwo gufatanya gukemura ibibazo bishya n’ibikomeje kwigaragaza bijyanye n’umutekano.

Yerekana icyerekezo gihuriweho cya Afurika gishingiye ku bufatanye ariko hitawe ku baturage mu gihe Isi ihanganye n’ibibazo by’umutekano bitandukanye.

Ni n’amahirwe yo kuganira ku cyerekezo cy’ahazaza mu guhangana n’imiterere mishya y’intambara zivuka, ndetse n’impamvu zigaragaza ko ari ngombwa zo gufatanya mu kubungabunga amahoro ku mugabane w’ Afurika n’ahandi ku Isi.

Iyi nama izaba ari umwanya w’ibiganiro by’ingenzi, ndetse no gutsura ubufatanye hagati y’ ibihugu dore ko izaba ihuriwemo n’abayobozi b’ingabo, inzobere mu bya gisirikare, n’abandi bafatanyabikorwa b’ingenzi mu by’umutekano n’amahoro mu karere no ku rwego mpuzamahanga.

Inama y’abagaba b’ingabo igiye kubera mu Rwanda, ije ikurikira indi Mpuzamahanga ku Mutekano muri Afurika u Rwanda rwakiriye muri Gicurasi 2025 izwi nka (International Security Conference on Africa: ISCA).

Ubwo Perezida Kagame yatangizaga ISCA yagaragaje ko ibibazo by’umutekano wa Afurika bidashobora gukemurwa n’ibisubizo bitanzwe n’abo hanze yayo.

Ati “Kuva kera umutekano wacu wafatwaga nk’umutwaro ugomba kwikorerwa n’abandi, tugiramo uruhare ruto cyane ntihagire inyungu zijyanye n’uburyo tubayeho cyangwa ubushake bwacu. Iyi mikorere ntiyatanze umusaruro haba kuri Afurika no ku Isi.”

Yavuze ko Afurika ikwiye kugira uruhare mu kwicungira umutekano nk’umufatanyabikorwa ukomeye kandi ufite ubushobozi, agaragaza umugabane utavuga abawuvangira baturuka hanze icyarimwe inishyiriraho ibituma bibaho.

Ati “Ubusugire bw’igihugu ntabwo bugarukira gusa ku kurinda umutekano w’imipaka, ni ukwiyemeza kwicungira umutekano nka Leta hamwe n’umugabane dufatanyije. Kwirengagiza iyi nshingano biha abandi urwaho rwo kubizamo bikaganisha ku gutakaza icyizere bakakuyobora.”

U Rwanda rwashyize imbaraga mu bijyanye n’umutekano, ibihamywa n’ubushakashatsi ngarukamwaka ku miyoborere bwakozwe n’Urwego rw’Imiyoborere, RGB, bwagaragaje ko umutekano n’ituze ry’abaturage byaje ku isonga mu byishimirwa n’abaturage n’amanota 93,82%.