Umuhanzi Niyo Bosco yategetswe gusiba amashusho y’umukobwa yihebeye

Niyo Bosco mu minsi ishize yasohoye indirimbo ye nshya ‘Eminado’ ikaba iya mbere yashyize hanze kuva yakwinjira muri KIKAC Music, none Imwe mu nkuru y’imyidagaduro igezweho muri iyi minsi ni iy’uyu muhazi Niyo Bosco waciye amarenga ko yaba asigaye afite inkumi yitwa Keza Nabrizza yihebeye mu buryo bw’urukundo.

Ni amakuru yasakajwe ku mbuga nkoranyambaga mu ijoro ryo ku wa 16 Mutarama 2024, nyuma y’uko uyu muhanzi asangije abamukurikira ku rubuga rwa Instagram, amashusho ari gusangira n’uyu mukobwa.

Ni amashusho uyu muhanzi yaherekesheje amagambo agaragaza urwo akunda uyu mukobwa, na we abinyujije ahatangirwa ibitekerezo aca amarenga yo kwihebera uyu musore.

Icyakora mu minota mike Niyo Bosco yari amaze gusiba aya mashusho, amakuru akavuga ko ari abashinzwe kureberera inyungu ze bahisemo ko ayo mashusho asibwa.

Uhujimfura Jean Claude ureberera inyungu Niyo Bosco wirinze kuvuga ku rukundo rw’uyu muhanzi, yavuze ko yemera ko aribo bamusabye gusiba ayo mashusho kuko bitari bijyanye na gahunda z’akazi bafite.

Abajijwe niba asanzwe abizi ko Niyo Bosco afite umukunzi yihebeye, Uhujimfura yabereye ibamba umunyamakuru, icyakora ahamya ko na we ibyo yabonye yari yasangije abamukurikira ari nabyo abandi babonye.

Kuva yasibishwa aya mashusho, IGIHE dukesha aya makuru, yagerageje kuvugisha Niyo Bosco ariko mu nshuro zirenga 20 twamuhamagaye ntabwo yabashije kwitaba telefone ye igendanwa.