Indege ya Uganda yarashe abasirikare ba RDC umwe acika amaguru

Indege y’intambara ya Uganda, Sukhoi-30, kuri uyu wa 16 Mutarama 2024 yarashe ku birindiro by’ingabo za Repubulika Iharanira Demokarasi ya Congo biri hafi y’umuhanda wa Eringeti-Komanda mu ntara ya Kivu y’Amajyaruguru.

Ikinyamakuru Chimpreports cyo muri Uganda cyatangaje ko cyahawe amakuru yizewe cyane, avuga ko habaye kwibeshya, iyi ndege irasa ku basirikare ba RDC, umwe muri bo acika amaguru, abandi benshi barakomereka.

Uwatanze aya makuru mu ibanga, yabwiye umunyamakuru ati “Ni ubwa gatatu ingabo zacu zirwanira mu kirere zirashe ibirindiro bya FARDC, kandi batangiye kudutakariza icyizere ku mikorere yacu yo ku rugamba.”

Yasobanuye ko impamvu aya makosa aba ari uko ibisirikare by’ibihugu byombi byananiwe guhuza ibikorwa byabyo. Ati “Impamvu y’ibi bibazo ni ubushobozi buke bwo guhuza ibikorwa.”

Ingabo za Uganda n’iza RDC zatangiye ibikorwa bihuriweho byo kurwanya umutwe w’iterabwoba wa ADF muri Kivu y’Amajyaruguru, mu Ugushyingo 2021.