M23 Yasabye Perezida Tshisekedi Kugaragaza Ko Azitabira Ibiganiro

Umutwe wa M23 wasabye Perezida wa Repubulika Iharanira Demokarasi ya Congo, Félix Tshisekedi, kugaragaza ku mugaragaro ko azitabira ibiganiro bizahuza Leta ya Congo n’uyu mutwe, nk’uko byatangajwe na Angola.

Perezidansi ya Angola iherutse gutangaza ko nyuma y’uruzinduko rwa Perezida Félix Tshisekedi i Luanda, hazategurwa ibiganiro bizahuza Leta ya Congo n’umutwe wa M23. Ibyo biganiro biteganyijwe kuba ku wa 18 Werurwe 2025 i Luanda, aho Angola izaba umuhuza.

Iki cyemezo cyashimwe n’umutwe wa M23, uvuga ko ari intambwe ikomeye mu nzira yo gukemura ibibazo by’umutekano mucye mu burasirazuba bwa Congo. Gusa haribazwa niba Leta ya Congo izitabira ibyo biganiro, kuko inshuro nyinshi yavuzwe ko ifata M23 nk’umutwe w’iterabwoba.

Ku wa 13 Werurwe 2025, ihuriro AFC/M23 ryasohoye itangazo rivuga ko nta gisubizo cyaboneka binyuze mu nzira za gisirikare, ahubwo ko hakenewe ibiganiro bigamije gukemura ikibazo mu mahoro.

M23 ivuga ko nubwo Angola yatangaje kuri Facebook ko ibiganiro bizaba, hakenewe ko Perezida Tshisekedi ubwe yemeza ko azabigiramo uruhare, kuko kugeza ubu Leta ya Congo itaratangaza ku mugaragaro uko ibyifatamo.

Nanone, uyu mutwe uvuga ko utarabona ubutumire bwemewe mu buryo bw’amategeko, uretse gusa itangazo ryashyizwe kuri Facebook ya Perezidansi ya Angola.

AFC/M23 yasabye ko ibyemezo byafatiwe mu nama yahuje Umuryango wa Afurika y’Iburasirazuba (EAC) n’Umuryango wa Afurika y’Amajyepfo (SADC) ku wa 8 Gashyantare 2025 byashyirwa mu bikorwa.

Umutwe wa M23 uvuga ko witeguye ibiganiro kandi usaba ko ikibazo gihari cyakemurwa mu mahoro, aho gukomeza gukoresha inzira y’intambara.

Kugeza ubu, Leta ya Congo ntiragira icyo itangaza ku mugaragaro ku bijyanye n’iyo nama iteganyijwe kubera i Luanda.