Minisitiri Nduhungirehe yanze kunamira Cirimwami mu nama

Minisitiri w’Ububanyi n’Amahanga, Olivier Nduhungirehe, yasobanuye ko impamvu atahagurutse ngo afate umunota wo kwibuka abasirikare ba SAMIDRC na MONUSCO baguye mu mirwano hagati y’umutwe wa AFC/M23 n’ihuriro ry’ingabo za RDC mu nama y’Akanama k’Amahoro n’Umutekano ka AU, ari uko mu mazina yasomwe y’abunamirwa havuzwemo n’irya Gen Maj Peter Cirimwami wari Guverineri wa gisirikare w’Intara ya Kivu y’Amajyaruguru.

Ni ubutumwa yanditse ku rubuga rwa X, asubiza ibyatangajwe na Minisiteri y’Ububanyi n’Amahanga ya Repubulika Iharanira Demokarasi ya Congo (RDC), yatangaje ubutumwa bw’Umunyamabanga wa Leta, Thérèse Kayikwamba Wagner, bwavugaga ko ubwo bari mu nama y’Akanama k’Amahoro n’Umutekano k’Umuryango wa Afurika Yunze Ubumwe (AU) kuri uyu wa 28 Mutarama 2025, Minisitiri Nduhungirehe ari we wenyine utahagurutse ngo yunamire abo basirikare.

Mu gusubiza kuri ubwo butumwa, Minisitiri Nduhungirehe yagize ati “Unyihanganire Madamu Munyamabanga wa Leta, mugenzi wanjye, ariko ubutumwa bwawe burayobya nk’uko bisanzwe. Mu by’ukuri wananiwe gusobanura mu butumwa bwawe, yuko mu rutonde rw’abasirikare Perezida w’Akanama k’Amahoro n’Umutekano ka AU yasabye ko hafatwa umunota wo kubunamira mu nama yo kuri iki gicamunsi, izina rya Gen Maj Peter Cirimwami, wari Guverineri wa gisirikare wa Kivu y’Amajyaruguru, na ryo ryavuzwemo.”

Yongeyeho ati “Nubwo uwo musirikare mukuru wa FARDC yanyakiriye mu cyubahiro cy’abadipolomate i Goma ku wa 5 Ugushyingo 2024, sinshobora, yaba uyu munsi cyangwa ejo, guhaguruka ngo mfate umunota wo kumwunamira. Impamvu yabyo ni uko, nk’uko nabyibukije mu nama yo ku gicamunsi, Peter Cirimwami yari ikiraro [gihuza FARDC] n’umutwe w’abasize bakoze Jenoside wa FDLR, ndetse ni na we wahungabanyije ibikorwa bya FARDC muri Nzeri 2024, byatangijwe ku gitutu cy’amahanga, byo gukuraho burundu umutwe wa FDLR.”

Umubano w’ibihugu byombi watangiye kuzamo urunturuntu ubwo umutwe wa M23 uharanira uburenganzira bw’Abanye-Congo cyane cyane abavuga Ikinyarwanda wuburaga imirwano.

Leta ya RDC yongeye kumvikana inshuro nyinshi ishinja u Rwanda gushyigikira uyu mutwe. Ni ibirego u Rwanda ruhakana, ahubwo rugashimangira ko Ingabo za Leta y’iki gihugu zikorana n’umutwe wa FDLR, wiganjemo abagize uruhare muri Jenoside yakorewe Abatutsi.

Kugeza ubu M23 imaze kwigarurira ibice bitandukanye mu Burasirazuba bwa RDC, birimo n’umujyi wa Goma, uyu mutwe uherutse kwigarurira.