Tshisekedi akomeje kurusha abandi amajwi bimuha amahirwe yo gukomeza kuyobora RDC

Félix Tshisekedi Tshilombo uyobora Repubulika Iharanira Demokarasi ya Congo akomeje kwanikira bagenzi be bahataniye umwanya w’Umukuru w’Igihugu.

Tariki ya 22 Ukuboza 2023 ni bwo Komisiyo yigenga ishinzwe amatora muri RDC, CENI, yatangaje umusaruro wa mbere wavuye mu matora y’Umukuru w’Igihugu; ihereye ku batoreye hanze, mu bihugu bitanu.

CENI yerekanye ko mu Bufaransa, Tshisekedi yagize amajwi 85,58%, agira 78,88% muri Leta Zunze Ubumwe za Amerika, agira 72,33% muri Canada, 75,94% mu Bubiligi na 81,27% muri Afurika y’Epfo.

Kuri uyu wa 24 Ukuboza, CENI yakoresheje écran ninini yamanitse kuri site nkuru ya Bosolo i Kinshasa, itangira kwerekana amajwi y’abatoreye imbere mu gihugu.

Muri rusange, hamaze kwerekanwa amajwi 1.029.616. CENI yerekanye ko Tshisekedi yabonyemo 850.684 angana na 82,60%, Moïse Katumbi wamukurikiye abonamo 147.053 angana na 14,30%, abandi bakandida 24 barimo Martin Fayulu na Denis Mukwege basaranganya amajwi 3,1%.

Itangazwa ry’amajwi biteganyijwe ko rirakomeza kuri uyu wa 25 Ukuboza, ku kigo cya Bosolo uko ava kuri site zitandukanye.

N’ubwo hakiri amajwi abarirwa muri za miliyoni mirongo (abari kuri lisiti y’itora bari hafi ya miliyoni 44), bigaragara ko Tshisekedi afite amahirwe yo kuyobora RDC muri manda ya kabiri, cyane ko n’abo bahanganye baciye amarenga ko ari yo biri kwerekeza, ubwo basabaga ko amatora asubirwamo.

Tshisekedi ayoboye RDC kuva mu 2019. Yegukanye amatora yabaye mu 2018 afite amajwi 38,56%, akurikirwa na Fayulu wagize 34,82%. Uyu musaruro wateje impaka kuko uyu Mukuru w’Igihugu yashinjwe kwiba intsinzi y’uyu mukandida bari bahatanye.