Nigeria: igisirikare cyibeshye cyica abasivili 16

Abasivile 16 bo mu Ntara ya Zamfara yo muri Nigeria, bishwe n’igitero cy’indege nyuma yo kubitiranya n’imitwe y’abagizi ba nabi.

Abahatuye babwiye ibinyamakuru ko abishwe bari abaturage bishyizwe hamwe kugira ngo birindire umutekano, no kurwanya imitwe ikunze kubagabaho ibitero ikabashimuta.

Igisirikare cya Leta cyasabye imbabazi ndetse cyihanganisha imiryango y’abishwe muri iki gitero.

Inzego z’umutekano zivuga ko zatangiye iperereza ku cyatumye habaho kwibeshya.

Hari abaturage babwiye ibiro ntaramakuru by’Abafaransa, AFP ko aba baturage bishwe ubwo bari bavuye kwirukana umwe mu mitwe y’abanyabyaha yari yabagabyeho igitero.

Si ubwa mbere habayeho igikorwa nk’iki cyo kwibeshya muri Nigeria kandi kigahitana abaturage benshi.

Muri 2023 abasivile 85 barishwe, ubwo bari bitabiriye amasengesho mu gace ka Kaduna nyuma yo kwitiranwa n’amabandi.

Muri Mutarama 2017 nabwo abantu 112 barishwe ubwo indege yarasaga mu nkambi yari icumbikiye abantu ibihumbi 40, bahunze ibikorwa by’iterabwoba hafi n’umupaka wa Cameroon.