UMUPILOTE WA TURKISH AIRLINES YAPFUYE ATWAYE INDEGE

Mu rugendo ruva mu mujyi wa Seattle muri Amerika rwerekeza muri Istanbul muri Turukiya, umupilote wari utwaye indege ya compani itwara abagenzi ya, Turkish Airlines, yapfuye ubwo yari atwaye indege.

Kapiteni Ilcehin Pehlivan, wari ufite imyaka 59, mu buryo butunguranye yacitse intege ata n’ubwenge ubwo indege yari iri mu kirere, nuko umupilote wa kabiri n’umupilote utwarana na kapiteni w’indege (umupilote mukuru) baba ari bo batwara indege, nkuko umuvugizi wa Turkish Airlines yabivuze ku rubuga nkoranyambaga X.

Umupilote wamwunganiraga mu gutwara iyo ndege ni we wahise ayitwara, ayigusha byihutirwa ku kibuga cy’indege cyo mu mujyi wa Syracuse muri Amerika.

Icyateye urupfu rw’uwo mupilote nticyatangajwe. Ubusanzwe abapilote bagomba gukorerwa ibizamini byo kwa muganga buri uko amezi 12 ashize, abafite imyaka irenga 40 bo bagomba gufata icyemezo gishya cyo kwa muganga nyuma ya buri mezi atandatu.

Ishimwe Erasme Didier