Menya uturere 7 twagaragayemo abarwayi ba Marburg mu Rwanda

Minisiteri y’Ubuzima yatangaje ko icyorezo cya Marburg cyageze mu Rwanda, giterwa na virusi ikomeye. Iyi virusi yemejwe nyuma yo gupima ibipimo byafashwe ku bantu batandukanye, bikoherezwa gusuzumwa muri Laboratwari y’Ikigo cy’Igihugu cyita ku Buzima (RBC).

Akarere ka Gasabo, Gatsibo, Kamonyi, Kicukiro, Nyagatare, Nyarugenge na Rubavu ni uturere twagaragayemo abarwayi ku ikubitiro. Kugeza ku wa 29 Nzeri 2024, abantu 26 bari bamaze kugaragaraho Marburg, muri bo umunani barapfuye.

Abanduye virusi ya Marburg batangiye kwitabwaho byihuse, kandi ubuvuzi bwihariye bwaratangijwe. Hakurikiranye n’ubushakashatsi bwo kumenya abandi bashobora kuba barahuye n’abanduye, aho abagera kuri 300 bashakishwa, muri bo abarenga 70% bakaba ari abakora mu nzego z’ubuvuzi.

Leta y’u Rwanda ifatanyije n’Ishami ry’Umuryango w’Abibumbye ryita ku Buzima (OMS) na bagenzi babo, bari mu bikorwa byo gushaka uko iyi ndwara yakwirindwa. N’ubwo kugeza ubu nta rukingo cyangwa umuti byihariye biraboneka, Leta ikomeje gukangurira abaturage kujya kwa muganga hakiri kare mu gihe bagize ibimenyetso.

Abanduye virusi ya Marburg bagaragaza ibimenyetso birimo:Umuriro ukabije,Kubabara umutwe n’imikaya cyane,Kurwara mu rwungano ngogozi (gucibwamo no kuruka),Kuvira imbere no hanze mu bice bitandukanye by’umubiri kandi Virusi yandura binyuze mu gukora ku matembabuzi y’uyirwaye nka maraso, ibyuya, n’ibindi.

Minisiteri y’Ubuzima, Dr Sabin Nsanzimana, yavuze ko iyi ndwara ari ubwa mbere yigaragaje mu Rwanda ariko yari isanzwe izwi mu bihugu bituranye, aho yagiye itera ibibazo bikomeye. Yibukije ko iyi virusi ikunze kuva ku nkende n’uducurama, kandi ishobora gutera urupfu ku gipimo cyo hejuru cyane.

OMS yemeza ko icyorezo cya Marburg cyica abarwayi ku kigero cya 88%, mu gihe idakurikiranwe neza cyangwa abantu batitabiriye kuvurwa hakiri kare.

Uganda 2012: Abantu 15 baranduye, bane barapfa.

Uganda 2017: Abantu batatu barayanduye, bose irabica.

Angola 2005: Abantu 374 barayanduye, muri bo 329 barapfa.

DRC (1998-2000): Mu bantu 154 banduye, 128 yarabahitanye.

Icyorezo cya Marburg gikomeje kuba impamvu yo kwita ku buzima no gushyira imbere ubwirinzi, aho abantu bagirwa inama yo gutanga amakuru y’abagaragaza ibimenyetso bakihutira kugana amavuriro.