Gen Muhoozi ateganya kongera guhura na Gen Tshiwewe wa RDC vuba

Umugaba Mukuru w’Ingabo za Uganda akaba n’umujyanama wihariye wa Perezida Yoweri Museveni mu bikorwa byihariye bya gisirikare, Gen Muhoozi Kainerugaba, ateganya guhura mu gihe cya vuba na mugenzi we wo muri Repubulika Iharanira Demokarasi ya Congo, Gen Christian Tshiwewe Songesha.

Aya makuru yatangajwe na Gen Muhoozi kuri uyu wa 20 Nzeri 2024, asobanura ko we na mugenzi we bazaganira ku buryo bwo kongerera imbaraga ubufatanye.

Yagize ati “Ndagira ngo mpe ikaze umuvandimwe wanjye wo muri Congo, Gen Christian Tshiwewe, Umugaba Mukuru wa FARDC vuba. Nshimira abasirikare b’intwaro ba FARDC ku bwo kwifatanya natwe mu gutsinda ADF. Tububaha nk’abasirikare. Twiteguye gukomeza ubufatanye.”

Gen Muhoozi na Tshiwewe baherukana muri Gicurasi 2024 ubwo bahuriraga mu gace ka Kasindi, ku mupaka wa RDC na Uganda. Icyo gihe baganiriye ku bufatanye bw’impande zombi mu bikorwa byiswe ‘Operation Shujaa’ byo kurwanya umutwe w’iterabwoba wa ADF byatangiye mu 2021.

Muri uru ruzinduko, Gen Muhoozi yaherekejwe n’Umugaba w’Ingabo zirwanira ku butaka, Lt Gen Kayanja Muhanga n’uwari Komanda w’ingabo ziri mu bikorwa byo kurwanya ADF, Gen Maj Dick Orum.