M23 yateguje intambara yeruye

Umutwe wa M23 watanze integuza y’uko ushobora kujya mu mirwano yeruye n’Ingabo za Repubulika Iharanira Demokarasi ya Congo, kubera ibitero zikomeje kugaba ku baturage ndetse no kubirindiro byawo.

Ni nyuma y’uko ku wa Kane tariki ya 12 Nzeri imirwano yumvikanye hafi umunsi wose hagati y’uyu mutwe na FARDC i Sake ho muri Teritwari ya Masisi.

M23 ivuga ko ibisasu by’ingabo za leta byahitanye abasivile bagera kuri batanu aho igenzura, mu gihe andi makuru avuga ko igisasu kivuye mu ruhande rwa M23 cyaguye i Mugunga hafi ya Goma kikica abana batatu.

Umuvugizi w’Ishami rya Politiki rya M23, Lawrence Kanyuka, yatangaje ko uruhande rwa leta ko muri iyi mirwano yo ku wa Kane rwarashe mu duce M23 igenzura “dutuwe n’abasivile” bigatuma “hapfa abasivile, n’abandi baturage benshi bacu bakava mu byabo”.

Kanyuka, mu itangazo, avuga amazina y’abantu batanu bapfuye mu duce bagenzura twa Bufaransa, Bihambwe na Tongo muri Masisi.

Uruhande rwa leta ntacyo ruravuga ku mirwano yo ku wa kane, gusa mbere leta yagiye ishinja M23 kwica amasezerano y’agahenge yumvikanyweho igatera ibirindiro by’ingabo za leta.

Kanyuka we yavuze ko “ibi bikorwa bishobora kuganisha ku ntambara yeruye nubwo hari umuhate w’abayobozi b’akarere n’abafatanyabikorwa mpuzamahanga wo kugera ku mahoro” mu burasirazuba bwa RDC.

Iyi mirwano ikomeye ivuzwe mu gihe hashize igihe hari agahenge abategetsi ba Kinshasa bavuze ko bishimira uko kubahirizwa.

Hagati aho, hari ibiganiro bikomeje i Luanda muri Angola, ikinyamakuru Africa Intelligence giheruka kwemeza ko mu biganiro biheruka guhuza inzego z’ubutasi za DR Congo n’u Rwanda hanatumiwe uruhande rwa M23.

Ku wa mbere w’iki cyumweru, Minisitiri w’itumanaho wa DR Congo, Patrick Muyaya, yatangarije France 24 ko nyuma “y’inama y’inzobere yabaye uyu munsi… Ndumva tariki 14 Nzeri hazaba inama yo ku rwego rw’abaminisitiri izagerageza gusesengura raporo y’inzobere.”

Muyaya yavuze ko i Luanda barimo kuganira ku bintu bibiri: “ku ruhande rumwe kuba FDLR igomba gusenywa, ku rundi ruhande ingabo z’u Rwanda ko zigomba kuhava”.

RDC ishinja ingabo z’u Rwanda kuba inyuma y’umutwe wa M23, ibyo u Rwanda ruhakana.

Abategetsi b’u Rwanda na bo bashinja aba Congo gufatanya n’umutwe wa FDLR urwanya ubutegetsi bw’u Rwanda; ibinashimangirwa na raporo zitandukanye z’impuguke za Loni.