M23 yaciye amarenga y’Igitero ku mujyi wa Goma

Umutwe wa M23 kuri uyu wa Gatatu, tariki ya 11 Nzeri 2024, waciye amarenga y’uko ushobora gutera Umujyi wa Goma mu Ntara ya Kivu y’Amajyaruguru, mu rwego rwo guhagarika ubwicanyi bumaze igihe buwukorerwamo.

Abatuye uyu mujyi bamaze iminsi bigaragambya bamagana ubwicanyi bukomeje gukorerwa muri uyu murwa mukuru w’intara.

Kuri uyu munsi, ubwicanyi bundi bwongeye kugaragara ubwo umurwanyi w’umutwe wa Wazalendo, umufatanyabikorwa wa Leta ya RDC mu kurwanya M23, yarasaga umunyeshuri wo mu ishuri rya Institut Mugara.

Uyu munyeshuri yarasiwe ahitwa Munigi, agace kari mu mujyi wa Goma. Amakuru avuga ko uyu mwana yarashwe biturutse ku bushyamirane bw’abasirikare babiri b’umutwe wa Wazalendo, aho umwe yagerageje kurasa mugenzi we ariko isasu rifata umwana.

Umuvugizi wa M23, Lawrence Kanyuka, yavuze ko ubwicanyi bukorerwa abaturage i Goma ari ikibazo gikomeye, ndetse ashinja imitwe yitwara gisirikare nka Mai-Mai na Wazalendo kwibasira abaturage n’abanyeshuri.

Yavuze ko ikibazo cy’ubwicanyi bukorwa n’iyi mitwe gikomeje kwiyongera, ndetse hari ingingo ikomeye ku mutwe wa M23 yo kwinjira mu mujyi wa Goma mu rwego rwo guhagarika izo nkozi z’ibibi.

Kanyuka yagize ati: “Ni ngombwa kandi birihutirwa guhagarika aya makuba abaturage ba Goma bamaze imyaka irenga ibiri bibasirwa na yo”. Ibi byatangajwe mu gihe Goma imaze imyaka yarihinduye indiri y’imitwe yitwara gisirikare n’ihuriro ry’ingabo za Leta ya RDC, harimo Mai-Mai, Wazalendo, ndetse na FDLR.

Colonel Nshimiyimana Augustin Alias Bora Manasse, umwe mu bakurikiranira hafi intambara yo mu Burasirazuba bwa Congo, yatanze inama ku mutwe wa M23 ko bakwiye gushyira iherezo ku mirwano ikomeye bakajyaho gahunda yihutirwa yo guhagarika ubwicanyi bukabije bukorerwa muri Goma, avuga ko bukabije kurenza ubukorerwa muri Gaza Strip.

Ameze atya, abaturage ba Goma bafite impungenge z’uko ibintu bishobora kuzamba mu gihe M23 yaba ifashe icyemezo cyo kugaba igitero kuri uyu mujyi w’iburasirazuba bwa Congo.