Uwahagarariye umubyeyi wa Perezida Kagame mu bukwe bwe yitabye Imana

Araya Assefa, Umunya-Ethiopia wari inshuti y’akadasohoka ya Perezida Paul Kagame, yitabye Imana ku wa 6 Nzeri 2024, afite imyaka 89.

Amakuru y’urupfu rwe yatangajwe ku mbuga nkoranyambaga, aho Perezida Kagame yagaragaje agahinda ke abinyujije ku rubuga rwa X, agira ati: “Araya Assefa nari muzi neza cyane. Yari umugabo mwiza. Yakoreye Loni. Aruhukire mu mahoro!”

Assefa yari azwi cyane mu buzima bwa Perezida Kagame, aho byavuzwe ko ari we wari mu mwanya w’umubyeyi wa Perezida Kagame ubwo yashyingirwaga na Madamu Jeannette Kagame ku wa 10 Kamena 1989 muri Uganda.

Uyu mukambwe yari inshuti ikomeye ya Perezida Yoweri Kaguta Museveni wa Uganda, ndetse yabaye Umuyobozi w’Ishami ry’Umuryango w’Abibumbye ryita ku Bana (UNICEF) muri Uganda mu myaka ya 1980.

Assefa yari azwiho kurwanya akarengane no gushyira ukuri imbere. Mu bihe bitandukanye, yagiye asura Maj Gen Paul Kagame akiri ku rugamba rwo kubohora igihugu, ndetse bakomeza kugirana ubucuti nyuma y’uko urugamba rwarangiye.

Urupfu rwe rwateye benshi agahinda, bitewe n’uruhare rwe mu kurwanya ihohoterwa, aho yibukwa nk’umuntu wagaragaje ineza n’ubushishozi mu mirimo yagiye akora.