Nyuma yo gutabarizwa na Gen Muhoozi Umudepite yafunguwe

Kuri uyu wa 30 Kanama 2024, Umudepite Michael Mawanda, ukomoka mu Nteko Ishinga Amategeko ya Uganda ndetse akaba n’umuyobozi ushinzwe ubukangurambaga mu ihuriro PLU (Patriotic League of Uganda), yafunguwe by’agateganyo nyuma yo gutanga ingwate y’amashilingi ya Uganda miliyoni 35 (angana na miliyoni 12,5 Frw).

Mawanda yari yatawe muri yombi muri Kamena 2024, akekwaho kunyereza amafaranga Leta yari yageneye ababohoye Uganda, amafaranga ngo yayanyujije mu ishyirahamwe Buyaka Growers. Gusa, gufungurwa kwe byaje nyuma y’icyemezo cy’urukiko rukuru rwa Kampala, rwari rwasabye ko arekurwa by’agateganyo.

Iyi nkuru y’impuruza yatangiye gucicikana nyuma y’uko Umugaba Mukuru w’Ingabo za Uganda, Gen Muhoozi Kainerugaba, ari nawe muyobozi w’iri huriro PLU, atabarije Depite Mawanda tariki ya 15 Kanama 2024. Gen Muhoozi yashimangiye ko ifungwa rya Mawanda rishingiye ku mpamvu za politiki, ashinja bamwe mu bayobozi bo mu ishyaka NRM riri ku butegetsi ko bamufungishije kubera ko ashyigikiye ibikorwa bya Gen Muhoozi muri Bushenyi.

Mu butumwa yanyujije ku mbuga nkoranyambaga, Gen Muhoozi yagize ati, “Michael Mawanda ni imfungwa ya politiki. Yafunzwe na bamwe mu bamunzwe na politiki ya NRM, bamuziza ‘icyaha gikomeye’ cyo gushyigikira Muhoozi Kainerugaba muri Bushenyi. Kumfasha ni cyo cyaha cyonyine. Murekure Mawanda!”

Gen Muhoozi yanasabye se, Perezida Yoweri Museveni, kwitabira iki kibazo no kumva amarira y’abasaba ko akarengane kagirirwa abarimo Depite Mawanda gahagarara.

Nyuma yo gushyira igitutu ku rukiko rukuru rwa Kampala ndetse no kwitabaza Perezida Museveni, Depite Mawanda yafunguwe by’agateganyo, ariko urugamba rwa politiki rukaba rukomeje hagati y’impande zitandukanye mu gihugu cya Uganda. Uyu mwuka mubi hagati ya Gen Muhoozi n’abayobozi ba NRM uri gutuma hibazwa byinshi ku hazaza ha politiki y’iki gihugu.