Umugore yabyaye abana 11

Umugabo witwa Yahya Nafiu, w’imyaka 56 ukomoka mu gihugu cya Nigeria, yemeje ko umugore we, Latoyossi Alake ukomoka mu gihugu cya Benin, yibarutse abana 11 barimo abahungu umunani n’abakobwa batatu. Icyakora, uyu muryango uri mu gahinda gakomeye kuko batatu muri aba bana bitabye Imana ubwo bavukaga, bigatuma hasigara abana icyenda.

Yahya yatangaje ko aba bana bavutse mu bihe bitandukanye hagati yo ku wa 7 Nyakanga na 14 Kanama 2024. Ati, “Yego, nibyo umugore wanjye yabyaye abana 11 nyuma y’igihe kinini atwite. Ni abahungu umunani n’abakobwa batatu. Abana bavutse mu mezi abiri atandukanye, hagati yo ku wa 7 Nyakanga na 14 Kanama 2024.”

Nubwo uyu muryango wishimiye kwakira aba bana, Yahya yagaragaje impungenge zikomeye ku buryo bwo gutunga aba bana. Yavuze ko kubona ubushobozi bwo kubarera bigoye cyane, kuko batari biteguye kubyara abana bangana gutya. Yahya yasabye Leta cyangwa abandi bantu bafite ubushobozi kugira icyo babafasha, kuko umuryango we uri mu bihe bikomeye.

Iyi nkuru  tuyikesha  ikinyamakuru Punch,  cyo muri Nigeria, aho uyu mugabo asaba inkunga kugira ngo bashobore kurera aba bana basigaye mu muryango wabo.