Perezida Kagame Yavuze ku Kibazo cya Moteri icana amatara muri Kigali Pelé Stadium

Perezida Paul Kagame yatangaje ko ikibazo cya moteri icana amatara muri Kigali Pelé Stadium idatanga urumuri ruhagije, kitagombaga kuba cyarabayeho. Iyi moteri ifite imbaraga nke zatumye Umujyi wa Kigali usaba ko nta mikino ya Shampiyona yazongera guhabera nijoro kugeza icyo kibazo gikemutse.

Abinyujije ku rubuga rwa X ku mugoroba wo kuri uyu wa 22 Kanama 2024, Perezida Kagame yasubije Umujyi wa Kigali wari watangaje ko hakomeje gushakishwa umuti urambye w’iki kibazo, harimo no gutumiza moteri nshya. Perezida Kagame yavuze ko iki kibazo kitagombaga kubaho na mbere hose, agaragaza ko bikwiye gushakirwa umuti uhamye.

This should NOT have happened in the first place!!!

— Paul Kagame (@PaulKagame) August 22, 2024

Iki kibazo cyongeye kuzamuka nyuma y’uko Umujyi wa Kigali uhamagarira Ishyirahamwe ry’umupira w’amaguru mu Rwanda (FERWAFA) guhagarika imikino ya nijoro kuri iyi stade kugeza igihe moteri izaba yashyikirijwe igihugu. Iki cyemezo cyafashwe mbere y’umukino wari uteganyijwe kuri uyu wa Gatanu, tariki 23 Kanama 2024, hagati ya Rayon Sports na Amagaju FC.

Umujyi wa Kigali watangaje ko moteri nshya izaba yageze mu gihugu mu mezi atatu ari imbere, kandi mu gihe abakinnyi bafite ubushobozi bwo kuzana moteri iyunganira, bemererwa gukina nijoro. Iki kibazo kimaze igihe kinini ndetse hari n’igihe iyi moteri yazimye umukino uri kuba, bigatuma ibikorwa bisubikwa.