Nyagatare: Umwana w’imyaka ibiri yarohamye muri Yorodani ya ADEPR ahasiga ubuzima

Ku wa Kane, tariki ya 15 Kanama 2024, umwana w’imyaka ibiri yitabye Imana nyuma yo kugwa muri yorodani (aho babatiriza) y’Itorero ADEPR Rukomo, mu Karere ka Nyagatare. Uyu mwana yari yacitse umubyeyi we (mama we) wari waje gusenga muri uru rusengero.

Aya makuru yemejwe n’Umunyamabanga Nshingwabikorwa w’Umurenge wa Rukomo, Ingabire Marie Claire, aho yavuze ko nyakwigendera yaguye muri yorodani ahagana saa Sita z’amanywa. Icyo gihe, muri urwo rusengero hari habaye umubatizo kandi bari bashyizemo amazi, kuko ubusanzwe ntibayashyiramo igihe batari bubatize.

Gitifu Ingabire yakomeje avuga ko nyina w’umwana yamusize mu rusengero ari bwo yagiye akina muri ayo mazi, akaza kugwamo. Bamukuramo yitabye Imana.

Ingabire yihanganishije umuryango wabuze umwana, asaba ababyeyi kwita ku burere bw’abana babo no gukurikirana ibyo bakora byose kugira ngo birinde impanuka nk’iyi ishobora gutuma bahura n’ibyago.