Umugabo yibye televiziyo ayigarura yuzuye inzuki umubiri wose

Umugabo wo mu Ntara y’Amajyepfo (Akarere byabereyemo ntikavuzwe) yibye televiziyo yo mu bwoko bwa ‘Flat’ mu rugo rw’abandi, ariko nyuma yo kwibasirwa n’inzuki umubiri wose, yagaruye iyo televiziyo. Ibi byabaye nyuma y’uko ba nyiri iyo televiziyo bifashishije umupfumu uzwi mu Rwanda witwa Salongo.

Amashusho yatambutse kuri shene ya YouTube ya BigTown TV ya Bac T, yagaragaje umuryango wibwe uvuga ko iyo televiziyo bari barayiguriye muri kompanyi ya MobiSol, aho bishyuraga make make. Nyuma yo kwibwa, ba nyir’iyo televiziyo ngo bagize uburakari maze biyambaza umupfumu Salongo ngo abagarurire ibyo bibwe.

Mu mashusho yasohotse, uwo mugabo wari wibye yagaragaye ateruye ya televiziyo ariko yuzuye inzuki ku gice cy’umutwe. Salongo yavuze ko izo nzuki zizavamaho ari uko umujura amaze gusubiza iyo televiziyo aho yayikuye.

Si ubwa mbere Salongo avugwa mu nkuru zigaruka ku byo yagaruje byibwe ndetse hakavugwa ko akora ibitangaza birimo no kuguruka. Gusa, hari abashidikanya kuri ibi bavuga ko ari uburyo bwo kumwamamariza, bagakeka ko ibyo bikorwa ari ibipange babeshya kugira ngo bamufashe kwamamara.