Trump yongeye kwibasira Abanye-Congo bari muri Amerika

Donald Trump, wahoze ari Perezida wa Leta Zunze Ubumwe za Amerika, yongeye kuvuga amagambo akomeye ku Banye-Congo bari muri Amerika, abashinja kuba abicanyi bavuye muri gereza zo muri Congo. Ibi yabivuze mu kiganiro yagiranye n’umuherwe Elon Musk ku rubuga rwa X ku wa 11 Kanama 2024.

Trump yavuze ko mu gihugu cye hamaze kwinjira Abanye-Congo 22 b’abicanyi, avugako aba bantu bari koherezwa muri Amerika nyuma yo kuvanywa muri gereza zo muri Congo kubera ko kubafunga bihenze.

N’ubwo atagaragaje neza niba abo avuga ari abo muri Repubulika Iharanira Demokarasi ya Congo (Congo-Kinshasa) cyangwa Repubulika ya Congo (Congo-Brazzaville), yavuze ko ari abakomoka muri Afurika.

Ibi si ubwa mbere Trump yibasira Abanye-Congo; muri Gashyantare 2024 yari yarabikoze mu kiganiro cya Fox News, aho nabwo yavugaga ko Abanye-Congo bari kuva muri gereza zabo bakaza muri Amerika.

Abategetsi baturuka mu bihugu byombi, Congo-Kinshasa na Congo-Brazzaville, bahakanye aya magambo ya Trump. Patrick Muyaya, umuvugizi wa guverinoma ya Congo-Kinshasa, yatangarije CNN ko ibyo Trump yavuze atari ukuri, amusaba guhagarika kuvuga ibinyoma.

Ambasaderi wa Congo-Brazzaville muri Amerika, Serge Mombouli, nawe yavuze ko ibyo Trump yavuze nta shingiro bifite, kandi nta gihamya.

CNN yagaragaje ko mu kiganiro na Elon Musk, Trump yabeshye inshuro zigera kuri 20, cyane cyane ku ngingo y’abimukira binjira muri Amerika. Iyi mvugo ya Trump yakomeje gutera impaka ndetse ikomeje kuganirwaho mu binyamakuru bitandukanye.