RIB yataye muri yombi umwana w’imyaka 13 akekwaho gusambanya umwana w’imyaka 3

Ku mugoroba wo ku wa 3 Kanama 2024, umwana w’imyaka 13 wo mu karere ka Rutsiro yatawe muri yombi n’Urwego rw’Igihugu rw’Ubugenzacyaha (RIB), akekwaho gusambanya mugenzi we w’imyaka itatu. Ibi byabereye mu murenge wa Musasa, mu Kagari ka Gisiza, mu mudugudu wa Karambi, ahagana mu masaha ya saa kumi z’umugoroba.

Bivugwa ko ibi byabaye mu rugo rw’uwitwa Hakizimana Frederic ubwo uyu mwana w’umuhungu yari yaje mu bukwe bwabereye muri uru rugo.

Umunyamabanga Nshingwabikorwa w’Akagari ka Gisiza, Mutabazi Thierry, yahamirije Bwiza aya makuru. Yagize ati, “Twahawe amakuru n’ubuyobozi bw’umudugudu wa Karambi ko uyu Toto yasambanyije umwana w’imyaka 3 ubwo yaramusanze mu rugo kwa Hakizimana Frederic, uyu mwana yari yajyanye n’ababyeyi be mu bukwe.”

Uwasambanyijwe yahise yoherezwa ku bitaro bya Murunda gukorerwa ibizami. Uyu Toto ukekwaho gusambanya umwana yahise ashyikirizwa RIB Sitasiyo ya Ruhango.