RDC Yatangiye Iperereza ku Ntumwa Zayo Zivugwaho Gushyikirana na M23

Ubutegetsi bwa Repubulika Iharanira Demokarasi ya Congo (RDC) bwatangiye iperereza ku buryo Prof. Bahala Okw’Ibale Lusheke Jean-Bosco, wahoze ari umuyobozi wa gahunda yo gusubiza mu buzima busanzwe abahoze ari abarwanyi (P-DDRCS), bivugwa ko yashakaga gushyikirana n’abahagarariye umutwe wa M23 mu mujyi wa Kampala muri Uganda.

Iyi ntumwa, hamwe na Mutuale Malangu Joseph David na Okankwa Bukasa Anselme, bahawe uruhushya rwo kujya mu butumwa bw’iminsi itanu na Minisitiri w’Ingabo, Guy Kabombo Mudiamvita, ku itariki ya 18 Nyakanga 2024. Uru ruhushya rwashyizweho umukono ntirwerekanye impamvu z’iki cyemezo, gusa umwe mu bayobozi bo mu biro bya Perezida Yoweri Museveni wa Uganda yabwiye ibiro ntaramakuru AFP ko intego nyamukuru yari gushyikirana n’intumwa za M23.

Uyu muyobozi, utifuje ko amazina ye amenyekana kubera ko atemerewe kuvugana n’itangazamakuru, yavuze ati, “Itsinda rihagarariye guverinoma ya RDC n’irya M23/AFC riri i Kampala mu biganiro byo kugarura amahoro muri RDC. Kuri ubu, iyi mishyikirano ni ibanga, ariko ibisobanuro birambuye bizatangazwa nyuma.”

Prof. Bahala yamenyesheje ko atari mu mishyikirano na M23, ahubwo ko we na bagenzi be bari i Kampala baganira na Uganda ku buryo abana b’Abanye-Congo bateweho intwaro n’umutwe wa LRA mu Repubulika ya Centrafrique bashobora kugarurwa.

Yagize ati, “Iby’imishyikirano na M23 ntabwo ari byo. P-DDRCS iri mu biganiro na Uganda ku gucyura abana baherutse kurekurwa na LRA muri Repubulika ya Centrafrique.”

Nyuma y’igihe gito, umuvugizi wa guverinoma ya RDC, Patrick Muyaya, yatangaje ko nta mishyikirano na M23 iri kuba. Ku wa 23 Nyakanga 2024, Perezida Félix Tshisekedi yahagaritse Bahala ku buyobozi bwa P-DDRCS, ariko nta mpamvu y’iki cyemezo yatangajwe.

Muyaya yemeje ko Bahala na bagenzi be boherejwe i Kampala baganira na Uganda ku buryo abana b’Abanye-Congo bacyurwa, kandi yavuze ko Bahala ashobora kuba yarakoze akazi atari agenewe. Yatangaje ko iperereza rigamije kumenya ukuri ku bikorwa bya Bahala, avuga ko bishoboka ko ashobora kuba yarakoresheje nabi ububasha yahawe na Minisitiri w’Ingabo.

Muyaya yagaragaje ko ibiganiro hagati y’Abanye-Congo na Leta yabo biyoborwa na Uhuru Kenyatta wayoboye Kenya, kandi ko Uhuru akomeza kuvugana n’impande zose zirebwa n’ibiganiro bya Nairobi.