Banki zo mu Rwanda zigiye kurushanwa

Irushanwa rihuza Banki rizwi nka ‘RBA Interbank Sports Tournament’ rigiye gukinwa ku nshuro ya gatanu kuva tariki ya 27 Nyakanga kugeza 31 Kanama 2024. Iri rushanwa ritegurwa n’Ihuriro rya Banki mu Rwanda, Rwanda Bankers’ Association (RBA), rizitabirwa n’ibigo umunani bizahatana mu mikino ine itandukanye.

Ibyo bigo ni Banki y’Abaturage (BPR), I&M Bank, NCBA Bank, Ecobank, GT Bank, Zigama CSS, Equity na Bank of Kigali (BK). Imikino izakinwa muri iri rushanwa ni umupira w’amaguru, Volleyball, Basketball no Koga.

Umuyobozi wa RBA, Ntore Francis Tony, yatangaje ko intego z’iri rushanwa ari ugufasha abakozi b’ibi bigo gukora siporo kugira ngo bagire ubuzima bwiza bubafasha gukora akazi neza. Yongeyeho ko iri rushanwa ritanga amahirwe ku bakinnyi yo kubona akazi, kuko impano zabo zigaragarira mu guhindura ibigo bakinira uko imyaka itandukana.

Ati:”Intego nkuru y’iri rushanwa ni ugufasha abakozi gukora siporo bityo bakagira ubuzima bwiza bubafasha gukora akazi neza. Hari ukumenyana no kungurana ubumenyi.”

Yakomeje avuga ko bamwe mu bakozi bafite impano bariboneramo amahirwe yo kubona akazi.

Mu mupira w’amaguru, hakozwe amatsinda abiri agizwe n’amakipe arindwi. Irya mbere rigizwe na Equity Bank, NCBA na I&M Bank. Irya kabiri ririmo BK, Zigama CSS, BPR na GT Bank.

Muri Basketball, hakozwe amatsinda abiri, aho irya mbere ririmo BK, NCBA na Ecobank. Irya kabiri ririmo Equity Bank, BPR na I&M Bank.

Muri Volleyball, hitabiriye amakipe atatu gusa ariyo Zigama CSS, BPR na BK, bityo akazakina mu buryo bwa round robin aho buri kipe izahura n’indi yose.

Mu mwaka ushize, ubwo ryari ryitabiriwe n’amakipe icyenda, Equity Bank yihariye ibikombe by’umupira w’amaguru na Volleyball, mu gihe BK yahize andi muri Basketball.

Iri rushanwa rikurikiza amategeko yose mpuzamahanga uko ateganywa n’amashyirahamwe yayo.