Rwamagana: Barinubira ibura ry’amazi ngo ijerekani iragura umugabo igasiba undi

Abaturage bo mu Karere ka Rwamagana, cyane cyane abatuye mu Mujyi no mu nkengero zawo, bari mu bibazo by’ibura ry’amazi rikabije. Ijerekani imwe y’amazi ishobora kugura guhera kuri 500 Frw kuzamura, ibintu bibangamiye cyane abaturage.

Ibi bibazo byatangiye kugaragara mu mpera za Mata, aho hashyizweho ingengabihe yo gusaranganya amazi nibura rimwe mu cyumweru. Ariko, abaturage baravuga ko iyi gahunda itubahirizwa nk’uko bikwiye.

Ubundi, mu Karere ka Rwamagana hakwirakwizwa metero kibe 2600 z’amazi buri munsi, aya akaba ari 11% gusa by’amazi akenewe muri aka Karere. Ibi bituma habaho ibura ry’amazi, hiyongeraho n’amatiyo ashaje.

Umwe mu baturage bo mu Kagari ka Nyagasenyi yavuze ko amara amezi abiri adafite amazi mu robine. Yagize ati:

“Iwanjye duheruka amazi mu matariki ya mbere y’ukwa Gatanu. Ingaruka byangizeho ni uko nibura buri munsi nkoresha 3000 Frw by’amazi. Ni ibintu bibangamye cyane.”

Twagirayezu Augustin we yavuze ko ibura ry’amazi ryatumye ahagarika akazi ke k’ubufundi:

“Ingaruka bitugiraho akazi karahagarara, nk’ubu tuba twashomereye nta muntu wakubaka yaguze ijerekani ya 500 Frw.”

Niyibikora Jean de Dieu na we yavuze ko ubusanzwe umuryango we urya kubera akazi k’ubuyede cyangwa kubumba amatafari, ariko ubu akazi ke kahagaze kubera ibura ry’amazi.

Umuyobozi wa Wasac mu Karere ka Rwamagana, Mugeni Geneviève, yavuze ko amazi agabanuka cyane mu gihe cy’izuba kubera ukwiyongera kw’abaturage no gukaza ibikorwa by’ubwubatsi. Mugeni yijeje ko hari gahunda yo gusaranganya amazi mu baturage:

“Hari aho amazi atagera kubera imiterere yaho hakaba n’igihe ingengabihe idakurikizwa bitewe n’uko hari ahantu haba hakenewe amazi mu buryo bwihuta nko ku bitaro, ku mashuri y’abana n’ahandi.”

Umuyobozi w’Akarere ka Rwamagana, Mbonyumuvunyi Radjab, yavuze ko ikibazo cy’amazi kizakemurwa n’uruganda rw’amazi rwa Karenge ruzatwara miliyari 62 Frw, rukazaha amazi Umujyi wa Kigali ndetse n’Akarere ka Rwamagana. Uru ruganda ruzajya rutanga metero kibe ibihumbi 48 buri munsi.

Ibikorwa byo kubaka ibigega bya Muyumbu na Bihembe biri gukorwa kugira ngo bifashe mu gukwirakwiza amazi hirya no hino mu mirenge itandukanye y’aka Karere.

Ibura ry’amazi rifite ingaruka zikomeye ku miryango itandukanye, kuko rituma akazi kahagarara ndetse n’imibereho yabo ikabangamirwa. Abaturage basaba ubuyobozi ko bwakwihutisha isaranganya ry’amazi kugira ngo bigabanye ibibazo bafite ubu.