Premier Betting yahagaritswe gukorera mu Rwanda

Ikigo gikora ibijyanye no gutega n’imikino y’amahirwe cya Premier Betting cyahagaritswe mu Rwanda nyuma y’uko icyemezo cyacyo cyo gukorera mu gihugu cyarangiye kandi ubusabe bwo kucyongera ntibwemerwe.

Mu ibaruwa  yandikiwe Umuyobozi w’iki kigo, igaragaza ko icyemezo cyacyo cyo gukorera mu Rwanda nk’ikigo gikora ibijyanye no gutega binyuze kuri internet cyarangiye, ariko ubusabe bwo kucyongera ntibwemerwe. Iyi baruwa yanditswe na Minisiteri y’Ubucuruzi n’Inganda, yasinyweho na Minisitiri Prof. Jean Chrysostome Ngabitsinze, igaragaza ko Solidaire Rwanda Ltd (izina rishya ry’iki kigo) itakongerewe uruhushya rwo gukomeza ibikorwa by’imikino y’amahirwe.

Ibaruwa ivuga ko iki kigo cyasabye kongererwa uruhushya rwo gukorera mu Rwanda mu mwaka wa 2022, ndetse icyo gihe cyari gifite uburenganzira bwo gukomeza ibikorwa byo gutega kugeza hafashwe icyemezo ntakuka ku busabe bwacyo. Ariko mu kwezi gushize, ubusabe bwabo ntibwigeze bwemerwa, bityo iki kigo kitemerewe gukomeza ibikorwa byacyo.

Ibaruwa iragira iti: “Nyuma yo gusuzuma dosiye zisaba uburenganzira bwo gukorera mu Rwanda, turashaka kubamenyesha ko ubusabe bwo kuvugurura uruhushya rwo gukora ibijyanye no gutega hifashishijwe internet mutarwemerewe.”

“Kubera iyo mpamvu, uburenganzira bwo gukomeza ibikorwa byo gutega bwatanzwe mu ibaruwa yavuzwe haruguru bivanyweho. Murasabwa rero guhagarika ibikorwa mu buryo bwihuse.”

Iki kigo kandi cyandikiye abari basanzwe bakigana kibamenyesha ko kitagikorera mu Rwanda, kibasaba kubikuza amafaranga yabo kuri konti zacyo mu maguru mashya.

Iki cyemezo cyafashwe gishobora kugira ingaruka ku bantu benshi bari basanzwe bakoresha serivisi za Premier Betting mu Rwanda, ndetse kikaba ari ikimenyetso ko inzego zishinzwe ubucuruzi n’imikino y’amahirwe mu Rwanda zihagurukiye gukurikirana ibikorwa by’uyu mwuga mu buryo bukomeye.