Inkende zagabye igitero ku biro by’Akarere zituma abayobozi badatanga serivisi

Amakuru aturuka mu gihugu cya Uganda aravuga ko hari inkende nyinshi zagabye igitero ku biro by’Akarere ka Mubende gaherereye muri kiriya gihugu, zikaba zigakoresha uko zishatse ndetse ngo zinatuma batanga serivisi mbi kuko zihora zitera abakozi ubwoba.

Aya makuru y’uko babangamirwa n’izi nkende yemejwe n’umwe mu bayobozi bo muri aka Karere witwa Samuel Mayanja, wavuze ko zibatera ubwoba kuko zinjira mu biro zinyuze mu madirishya. Ati, “Buri gihe dusanga izo nkende mu biro kandi bye, iyo umuntu ari kuri mudasobwa akora akazi runaka, inkende zimutera ubwoba kuko zinjira mu biro zinyuze mu madirishya.”

Mayanja yahamagariye ikigo gishinzwe inyamanswa muri Uganda gufata izi nkende bakazijyana aho zigomba kuba.

Si uyu muyobozi gusa kuko umujyanama w’Akarere, Aisha Ayebare, yavuze ko inkende zagiye zangiza impapuro nyinshi zo mu biro by’Akarere. Ati, “Akarere kacu kari hafi gutakaza ibyangombwa kubera ko izo nkende zihora zinjira mu biro zigatwara ibyo byangombwa.”

Ku rundi ruhande, abajyanama b’aka Karere bavuga ko impamvu izi nkende zaje kwibera ku biro by’Akarere ari uko amashyamba zabagamo yatemwe zikabura aho ziba.

Abahakorera bafite ubwoba ko zishobora kubatera ibibazo birimo n’indwara. Icyakora ngo ubuyobozi bw’Akarere bubishinzwe bwavuze ko bugiye gukurikirana iki kibazo kigakemuka mu maguru mashya.