Mukabalisa Donatille yavuze icyatumye PL ihitamo gushyigikira Paul Kagame

Ku wa Gatandatu tariki ya 6 Nyakanga 2024, Perezida w’Ishyaka riharanira Uburenganzira bwa Muntu (PL), Mukabalisa Donatille, yatangaje ko ishyaka PL ryiyemeje gushyigikira Paul Kagame nk’umukandida mu matora ateganyijwe muri Nyakanga 2024. Ibi yabivuze ubwo Paul Kagame yakomerezaga ibikorwa bye byo kwiyamamaza mu Karere ka Bugesera.

Mukabalisa yagize ati: “Impamvu zatumye duhitamo ntabwo zibarika kandi n’uwazivuga bwakwira bugacya. Gusa, igihugu cyacu cyagize umugisha udasanzwe wo kubagira nk’umuyobozi udasanzwe kubera imiyoborere yanyu myiza.” Yashimye Kagame ku bikorwa bye by’indashyikirwa, birimo kugarura ubumwe n’ubwiyunge mu Banyarwanda no guha u Rwanda umutekano rusagurira n’amahanga.

Yagaragaje ko Paul Kagame yagaruriye Abanyarwanda icyizere, agasubiza isura nziza y’u Rwanda mu ruhando mpuzamahanga. Mu bihe byashize, Bugesera yateye imbere cyane muri serivisi z’amashanyarazi, amazi, ubuhinzi, ubworozi, uburezi, ubuzima, ndetse no mu myubakire y’imiturire.

Iterambere rigaragara mu karere ka Bugesera rigizwe n’ibikorwa byinshi by’ingenzi:

Amashanyarazi: Hubatswe uruganda rwa Rusumo, sitasiyo ya Shango na Bugesera, hagezwa amashanyarazi mu mirenge ya Rweru, Kamabuye, Ngeruka, Mareba, Nyarugenge, Shyara na Gashora.

Amazi: Hubatswe uruganda rutunganya amazi rwa Kanzenze, byongera serivisi z’amazi mu baturage.

Imiturire: Hubatswe imidugudu y’icyitegerezo muri Rweru, Kivusha na Musovu, ituma imiryango 418 ituzwa neza, indi 1151 ikavanwa mu manegeka.

Ubuhinzi n’ubworozi: Havuguruwe urugomero rwa Rurambi rutwara miliyari 2,5 Frw, rwifashishwa mu kuhira igishanga cya hegitari 1000.

Ubuzima: Hubatswe Mobile Clinic y’Ibitaro bya Nyamata na Ngeruka.

Ubuzima: Hubatswe Mobile Clinic y’Ibitaro bya Nyamata na Ngeruka.

Uburezi: Hubatswe ibyumba by’amashuri 1063 bitwara miliyari 6,7 Frw, amashuri 11 y’Imyuga n’Ubumenyingiro atwara 475.590.477 Frw.

Kurwanya ubukene: Abasaga ibihumbi 39 bahawe akazi muri VUP, hubatswe hanasanwa amazu y’abatishoboye 4.698.

Mukabalisa Donatille wahoze ayoboye Inteko Ishinga Amategeko, yahamije ko ishyaka PL rizatora Paul Kagame 100%, asaba n’Abanyarwanda bose kumuhundagazaho amajwi.