Abapolisi babiri bo muri Sudan y’Epfo bafatiwe muri Congo baje gushimuta abantu

Igisirikare cya Repubulika Iharanira Demokarasi ya Congo cyatangaje ko cyafashe abapolisi babiri bo mu gihugu cya Sudan y’Epfo, nyuma y’uko bari baje gushimuta bamwe mu baturage bari bafitanye amakimbirane. Aba bapolisi batawe muri yombi ku wa Gatatu, tariki ya 03 Nyakanga 2024, mu Ntara ya Bas-Uele.

Urwego rushinzwe Iperereza rwavuze ko aba bapolisi binjiye muri Congo mu buryo bunyuranyije n’amategeko. Ibi byabaye mu gihe ingabo za leta ya Kinshasa zarimo zihiga imitwe y’inyeshamba ikunze guhungabanya umutekano mu bice bya Waliwa na Faradja.

Amakuru avuga ko aba bapolisi bafatanwe imbunda ebyiri zo mu bwoko bwa AK-47 n’amasasu 57. Bakimara gutabwa muri yombi, bahise bajyanwa gufungirwa i Durba, ahari icyicaro cy’ingabo za karere ka Bas-Uele, mu gihe hagikorwa iperereza ryimbitse kugira ngo hamenyekane neza imvano y’iki gikorwa cyabo.

Iki gikorwa cyo gufata aba bapolisi kije mu gihe Congo ikomeje ibikorwa byo kurwanya imitwe y’inyeshamba igenda ikwirakwiza umutekano muke mu bice bitandukanye by’igihugu, hagamijwe kurengera abaturage no kugarura ituze mu gihugu.